Afg‘onistonda suv toshqinlari oqibatida halok bo‘lgan fuqarolar kamida 151 nafarga yetgan. Bu haqda "Reuters" Afg‘onistondagi muvaqqat hukumatga tayanib, xabar berdi.
Qayd etilishicha, juma kuni kuzatilgan kuchli yomg‘ir tufayli halokatli suv toshqinlari yuzaga kelgan. Mamlakat bo‘ylab davom etayotgan suv toshqinlari va noqulay iqlim sharoitlaridan eng ko‘p Bag‘lon viloyati zarar ko‘rgan. Viloyatdagi minglab uylar vayron bo‘lgan.
Xalqaro migratsiya tashkilotining "Agence France-Presse"ga bergan ma’lumotida esa qurbonlar soni 200 ga yetgani aytilgan. Toshqinlar davom etishi bilan halok bo‘lganlar soni ham oshishi ma’lum qilingan.
Muvaqqat hukumat Ichki ishlar vazirligi matbuot kotibi Abdul Matin Qane uchta viloyatda jabrlanganlar soni 138 kishini tashkil qilishini ma’lum qilgan. Jabrlanganlarga tezkor ravishda yordam ko‘rsatilgani bildirilgan.
“Tolibon” hukumatining bosh matbuot kotibi Zabihulloh Mujohid ijtimoiy tarmoqdagi postida “yuzlab odamlar bu dahshatli suv toshqini tufayli halok bo‘lgani, ko‘pchilik jarohat olgani” ni ma’lum qilgan.
Shimoldagi Bag‘londan tashqari, shimoli-sharqdagi Badaxshon, markaziy G‘or va g‘arbiy Hirot viloyatlari ham toshqinlardan jiddiy zararlangan, katta moliyaviy yo‘qotishlarga olib kelgan.
Toshqinlar sabab Badaxshonning 20 ming aholi yashaydigan Tishkan tumaniga kirish yo‘li to‘silib qolgan. Qutqaruv guruhlari ishlayotgani aytilmoqda.