Bobom urushga ketganida 18 yoshda bo‘lgan ekan. Janggohlardan omon qaytgach, ichki ishlar organlariga xizmatga kirib, 30 yil yong‘in xavfsizligi xizmatida faoliyat ko‘rsatgan. Keyinchalik bobomning maslahati bilan menda ham shu sohaga qiziqish uyg‘ondi. 2009-yilda sinovlardan muvaffaqiyatli o‘tib, yong‘in xavfsizligi xizmatiga qabul qilindim.

Bobom ko‘zlariga yosh olib «Kasbimni tanlaganingdan juda xursandman, bolam. Hech qachon yuzimni yerga qaratma, hamisha xalqqa sadoqat bilan halol xizmat qil», – deya duo qilgani hech qachon yodimdan chiqmaydi. 

Ana shu duo va o‘gitlar hayotimda muhim dasturilamalga aylandi. 15 yildirki, har kuni ishga ketayotganimda u kishining duosini olishga odatlanganman. 

Ilgari bobom bayram tadbirlarida ishtirok etib, mashhur «Katyusha» qo‘shig‘iga raqsga tushardi. Shu bois haligacha odamlar hazil qilib «Katyusha bobo» deb chaqiradi. Bir-ikki yildan buyon salomatligi yomonlashgani tufayli tadbirlarga borolmay qoldi. «Qani endi, yoshlikka qaytsam-u, oyoqla­rimga darmon kirib, «Katyusha»ga raqsga tushsam», deydilar.

Bobomning suhbatidan bahramand bo‘lish uchun xonadonimizdan mehmonlar arimaydi. Viloyat Ichki ishlar boshqarmasi rahbariyati, tuman hokimligi va ichki ishlar bo‘limi mutasaddilari, hudud profilaktika inspektori hamda mahalla faollari uni doim yo‘qlab, holidan xabar olib turishibdi. Xotira va qadrlash kuni yaqinlashgani sari uyimiz yanada fayzga to‘lmoqda. 

Bobom va buvijonim ahillikda 4 nafar farzand o‘stirgan. Nabiralarning soni 

10 nafardan, chevaralari esa 30 nafardan oshib ketgan.  

U kishi uzoq umr ko‘rish siri haqida gapirib, doim shunday maslahat beradi: «Qalbing toza bo‘lib, inson­larga hamisha yaxshilik qilsang, eng muhimi – xushchaqchaq yursang, albatta, yuzga kirasan!».

Muhiddin SHOKIROV,

Oltiariq tumani FVB 26-yong‘in qutqaruv 

qismi haydovchisi.