Belarus Rossiya bilan sinxronlashtirilgan, taktik yadroviy qurol tashuvchilardan foydalangan holda kutilmagan tekshiruv o‘tkazadi. Bu haqda respublika Xavfsizlik kengashi davlat kotibi Aleksandr Volfovich ma’lum qildi.

Uning aytishicha, armiya tayyorgarligini tekshirish mudofaa xarakteriga ega va boshqa mamlakatlarga tahdid solmaydi.

“Belarus Qurolli kuchlari Oliy Bosh Qo‘mondoni topshirig‘iga binoan joriy tekshirishga yadro qurolidan foydalanishga qodir kuchlar va vositalar jalb etiladi. Tekshiruv Rossiyada o‘tkaziladigan strategik bo‘lmagan yadro qurollaridan foydalanish mashg‘ulotlari fonida o‘tkaziladi”, deydi Volfovich.

Uning so‘zlariga ko‘ra, kutilmagan tekshiruvlar haqiqiy jangovar vaziyatga imkon qadar yaqin sharoitlarda o‘tkaziladi. Tekshiruv davomida harbiy qismlarni maxsus o‘q-dorilar bilan ta’minlash, ularni ishga tushirish moslamalariga yuklash va Su-25 hujumchi samolyotlariga osib qo‘yish ko‘nikmalari nazorat qilinadi.

"Iskander" raketa tizimlari va “Polonez” MLRS maxfiy pozitsiyalarga joylashtiriladi. Tekshiruv doirasida Su-25 hujumchi samolyotlari maxsus o‘q-dorilardan foydalanishga tayyorlanadi”, deya qo‘shimcha qildi Aleksandr Volfovich.

Uning so‘zlariga ko‘ra, to‘satdan tekshiruv natijasi Belarus harbiylarining mahoratini tasdiqlashi kerak.

Ma’lumot uchun, 6 may kuni Rossiya Bosh shtabi Vladimir Putin topshirig‘iga ko‘ra Janubiy harbiy okrug va dengiz kuchlarining raketa tuzilmalari uchun mashg‘ulotlarga tayyorgarlik ko‘rishni boshladi. Ular "strategik bo‘lmagan yadroviy qurollardan foydalanish masalalari" ustida ishlashni rejalashtirmoqda. Kremlning ma’lum qilishicha, mashg‘ulotlarga Fransiya Prezidenti Emmanuel Makronning Ukrainaga qo‘shinlarning ehtimoliy o‘tkazilishi haqidagi bayonotlari sabab bo‘lgan.