Iqtidor insonga berilgan noyob ne’matki, uning yuzaga chiqishi uchun ham imkoniyat zarur. Yoshlarimiz baxtiga mamlakatimizda qobiliyatli o‘g‘il-qizlarimizning nafaqat zamonaviy bilim olishi, balki o‘z iqtidorlarini namoyish etishi uchun ham keng imkoniyatlar yaratilmoqda. IIVning Ixtisoslashtirilgan maktab-internatida ham bilimli va iqtidorli yoshlar talaygina. Xususan, Anvar Izzatov va Shohjahon Farhodov ana shunday a’lochi va iqtidorli o‘quvchilar safida. Ikkisi ham umumta’lim fanlarini a’lo baholarga o‘zlashtirish barobarida, sportning bir nechta turlari bilan muntazam shug‘ullanishadi. Ular ma’naviy-ma’rifiy tadbirlarda ham faol. 

– Ta’lim muassasamizdagi iqtidorli yoshlarga to‘g‘ri yo‘nalish berib, qobiliyatlarini yuzaga chiqarishda ko‘maklashish faoliyatimizning asosini tashkil etadi, – deydi ingliz tili o‘qituvchisi Abrorxo‘ja Mo‘minxo‘jayev. – Bizning zimmamizga millatimizning ertangi kuniga mas’ul bo‘ladigan yoshlarga ta’lim berishdek ulkan va sharafli vazifa yuklatilgan. Bu borada bor kuch va imkoniyatimizni ishga solib, ta’lim beramiz. Yaqinda Anvar Izzatov va Shohjahon Farhodovning Oliy ta’lim, fan va innovatsiyalar vazirligi huzuridagi Bilim va malakalarni baholash agentligi tomonidan beriladigan chet tilini bilish darajasi to‘g‘risidagi «B1» darajali sertifikatni qo‘lga kiritishgani quvonarli holdir.  

– Matematika shunday fanki, u qiziqqan odamni o‘ziga ohanrabodek tortib oladi, – deydi o‘qituvchi Mohigul Ashurova. – Shohjahon va Anvarning ham matematika faniga qiziqishi baland. Bergan topshiriqlarimni ortig‘i bilan bajaradi. Murakkab misol uchrasa, darhol yordam so‘raydi. Ular singari bilimga chanqoq yoshlarning borligi o‘quvchilar o‘rtasida sog‘lom raqobatni paydo qiladi, albatta. Bu esa muallim sifatida bizni quvontiradi. 

Sarvar SOBIROV,

o‘z muxbirimiz.