Ota-ona uchun farzandining kamolini ko‘rishdan ortiq baxt bo‘lmasa kerak. Ayni paytda Qarshi shahridagi 4-umumta'lim maktabining 9-sinfida tahsil olayotgan o‘g‘lim Mirfayzbek Abdullaeyv a'lo baholarga o‘qib, fan olimpiadalarida g‘oliblikni qo‘lga kiritdi. U hozirda Yoshlar ittifoqi viloyat kengashida sardor. 

Bir kuni o‘g‘limdan «Sardorlik, umuman, faollik senga nima berdi?» deb so‘radim. U ishonch bilan shunday dedi: «Ijtimoiy faollik menda, birinchi navbatda, hayotiy ko‘nikmalar, masalan, notiqlikni, jamoani boshqarish qobiliyatini, mustaqil tarzda loyihalar tashkil etish ko‘nikmalarini shakllantirishda muhim rol' o‘ynadi».

O‘tgan yilning dekabr oyida respublikamizning barcha hududlarida «Rahbar va yoshlar» uchrashuvlari o‘tkazildi. Qashqadaryo viloyatida bo‘lib o‘tgan uchrashuvlardan birida Mirfayzbek viloyat hokimi Murotjon Azimovga eng namunali va iqtidorli maktab o‘quvchilari uchun «Viloyat hokimi stipendiyasi»ni joriy etish bo‘yicha taklifni bildirdi. 

E'tiborlisi, bu taklif qo‘llab-quvvatlanib, joriy yilning 13-yanvarida «Viloyatdagi eng namunali va eng iqtidorli o‘quvchilar «Viloyat hokimi stipendiyasi»ni joriy etish to‘g‘risida»gi qaror qabul qilindi. Bu xabardan o‘g‘lim va uning tengqurlari, butun voha o‘quvchilari juda xursand bo‘ldi. 

Tadqiqotlarga qaraganda, «Tengdosh – tengdoshga» tamoyili eng yaxshi samara beradigan usullardan biri ekan. Bu qaysidir o‘quvchi biron bir mavzuda tengdoshi bilan suhbatlashsa, fikrlashsa, natijadorlik yuqori bo‘ladi, degani. Mirfayzbek ana shu tamoyilga tayangan holda, maktab o‘quvchilari bo‘lgan tengdoshlari bilan bir qancha loyihalarni amalga oshirdi. 

Ayni paytda viloyatda o‘quvchilarning intellektual salohiyatlarini yuzaga chiqarish maqsadida «Intellektual olimpiada» loyihasiga start berildi. Bu jarayonda «Munozara», «Kamalak», «Ekologik muammolar bolalar nigohida» kabi loyihalar namoyishi rejalashtirilgan. Bu tadbirlarda o‘g‘lim ham munosib qatnashmoqda. 

Mamlakatimizda mavjud keng imkoniyatlardan oqilona foydalanayotgan yoshlar barcha sohalarda katta yutuqlarni qo‘lga kiritmoqda. Ana shunday intiluvchan yoshlar orasida farzandim Mirfayzbek ham borligidan faxrlanaman! 

Sirojiddin RAHIMOV,

podpolkovnik.