Har bir maqsadning muvaffaqiyatli ro‘yobiga erishish va omadsizlikdan qutulish mumkinmi? Buning uchun har kim ishni, avvalo, o‘zidan boshlagani ma'qul. Misol uchun, kitob o‘qish, o‘z ustida ishlash, bilmaganni so‘rab o‘rganish maqsadga muvofiq. Omad kaliti doim kissangizda bo‘lishini istasangiz, ba'zi qoidalarga amal qilishga to‘g‘ri keladi.

1. Inson nafaqat o‘z xatti-harakatlari, balki ularning natijasi uchun ham mas'uliyatni bo‘yniga olishni, har bir ishi uchun javob berishni o‘rganishi kerak.

2. Taqdirdan tuhfalar kutib o‘tirish noto‘g‘ri, bu ketishda biron narsaga erishish amrimahol. Muvaffaqiyat har kunlik mashaqqatli mehnatdir. 

3. Yaxshi lavozimga erishish yo‘lida kamchiliklar uchun qayg‘urish emas, fazilat va qobiliyatlarni ishga solish kerak. Chunki ular faqat bizga ayon va buni hammaga namoyon etish lozim. Har kim o‘zini munosib baholashni o‘rganishi, o‘zi sevgan ish bilan shug‘ullanishi zarur. Shunda o‘sish zinasi bo‘ylab harakat ham yoqimli va quvonchli kechadi.

4. Aksariyat insonlar xatoga yo‘l qo‘yishdan qo‘rqib, ishga qo‘l urmaydi. Xato qilish odamzotga xos, shunchaki uni ko‘ra bilish, tan olish va o‘z vaqtida to‘g‘irlash muhim. 

5. Atrofdagilar bilan muomala qilish qoidalariga amal qilish ahamiyatli. Eng muhimi, jamiyatda har bir insonning o‘z o‘rni va qadri bo‘lsin. Atrofdagilarga qo‘ldan kelguncha yordam qiling, o‘zingiz ham ko‘mak yoki maslahat so‘rashdan uyalmang.

Unutmang, omad hammaga kulib boqadi, lekin har kim ham unga kulib javob qaytarmaydi va bu faqat ularning aybidir.

Gulchehra AZIMOVA tayyorladi.