O‘lkamizga bahor fasli kirib keldi. Albatta, ko‘klam go‘zallik va yosharish fasli hisoblanadi. Aynan bahorning boshida Xalqaro xotin-qizlar bayramining nishonlanishida ham qandaydir uyg‘unlik va ma'joziy ma'no bor. 

Mo‘tabar onalarimiz, dilbar opa-singillarimizning mehri, fidokorligi oldida esa dunyo bosh egadi. Xotin-qizlar tufayli oilada tinchlik-totuvlik, farovonlik, jamiyatimizda esa barqarorlik, taraqqiyot bo‘ladi. Shu boisdan mamlakatimizda xotin-qizlarning huquq va manfaatlarini himoya qilish, ijtimoiy-siyosiy faolligini oshirish, tashabbuslarini har tomonlama qo‘llab-quvvatlash, onalik va bolalikni himoya qilish borasida ko‘pgina ijobiy ishlar amalga oshirib kelinmoqda. Ushbu ishlarni qonun yo‘li bilan mustahkamlash maqsadida “Xotin-qizlar va erkaklar uchun teng huquq va imkoniyatlar kafolatlari to‘g‘risida”, “Xotin-qizlarni tazyiq va zo‘ravonlikdan himoya qilish to‘g‘risida”, “Oila va xotin-qizlarni tizimli qo‘llab-quvvatlashga doir ishlarni yanada jadallashtirish chora-tadbirlari to‘g‘risida” va boshqa qator qonun hujjatlari qabul qilingan.

Bugungi kunga kelib xotin-qizlar davlat va jamiyat qurilishi hamda boshqaruvidagi mas'uliyatli lavozimlarda faoliyat ko‘rsatishmoqda. Jumladan, ular ichki ishlar organlarida erkaklar bilan bir safda turib, mashaqqatli vazifalarini sharaf bilan bajarib kelayotganligini aytib o‘tish o‘rinli bo‘ladi. So‘zimning yakunida yurtimizdagi barcha nozik xilqat vakilalarini bayram bilan tabriklab, qadringiz va qaddingiz baland bo‘lsin degim keladi. Zero, ayol baxtli bo‘lsa, oilada tinchlik-totuvlik ta'minlanib, jamiyatimiz yanada mustahkamlanib boraveradi.

Sayyora QULIMBETOVA 

Qoraqalpog‘iston Respublikasi IIV JXX HPB katta inspektori, mayor.