Bryusselda bo‘lib o‘tgan sammitda Yevropa Ittifoqiga a’zo davlatlar rahbarlari Ukrainaga kelasi to‘rt yil uchun 50 milliard yevro miqdorida uzoq muddatli byudjet yordami ajratishni ma’qulladi. Bu Ukraina uchun byudjet mablag‘larining 2023 yil darajasiga nisbatan 1,5 barobar qisqarishini anglatadi. Dastur ma’qullangani haqida Yevropa Kengashi rahbari Sharl Mishel X ijtimoiy tarmog‘ida Yevropa Ittifoqining favqulodda sammiti boshlanganidan bir necha daqiqa o‘tib ma’lum qildi.

“Barcha 27 yetakchi Yevropa Ittifoqi byudjetidan Ukrainani qo‘llab-quvvatlash paketi doirasida qo‘shimcha 50 milliard yevro ajratishga kelishib oldi”, deydi Mishel. 

Agar bu mablag‘lar Kiyevga o‘z vaqtida to‘lansa, bu uning Bryusseldan byudjet mablag‘lari 2023 yilga nisbatan 1,5 barobarga qisqarganini anglatadi. 2023 yil uchun Yevropa Ittifoqi Kiyevga 18 milliard yevro ajratdi, oyiga 1,5 milliard yevro to‘ladi, to‘rt yil davomida 50 milliard yevro ajratish esa oyiga 1,02 milliard yevro miqdoridagi to‘lovlarni anglatadi. 

Mishel ushbu moliyalashtirish shartlari va uning manbalariga aniqlik kiritmagan. 

Shu bilan birga, “Reuters” o‘z manbalariga tayanib, Bryussel 2023 yil dekabr oyida ushbu yordam paketini bloklagan Vengriya Bosh vaziri Viktor Orbanning asosiy talabini bajarishga rozi bo‘lganini xabar qildi. Kiyevga to‘lovlar avtomatik tarzda amalga oshirilmaydi. Yevropa Ittifoqi rahbarlari ularni har yili qayta ko‘rib chiqishlari va Kiyevning Bryusselning barcha talablariga muvofiqligini nazorat qilishlari kerak.