Isroil razvedka agentligi “Mossad” Birlashgan Millatlar Tashkilotining Yaqin Sharqdagi Falastinlik qochqinlarga yordam ko‘rsatish agentligining (UNRWA) 190 nafar xodimini 2023 yil 7 oktyabrda Isroilga qilingan hujum paytida qotillik va odam o‘g‘irlashda ayblab, ularning ro‘yxatini e’lon qildi. Bu haqda Mossad hisobotiga tayanib, “Reuters” xabar berdi.

Hujjatga ko‘ra, UNRWA’ning ushbu xodimlari 7 oktyabr kuni Isroilga uyushtirilgan hujumda HAMAS radikal harakatiga yordam berganlikda ayblanmoqda. 190 nafar ishchi agentlikning G‘azodagi 13 mingga yaqin kishini tashkil etadigan umumiy ishchi kuchining qariyb 15 foizini tashkil qiladi.

Bir qancha davlatlar, jumladan, AQSH, Buyuk Britaniya, Fransiya, Germaniya va Kanada tashkilotning ba’zi xodimlarining HAMAS bilan aloqalari borligi vaji bilan UNRWA'ni moliyalashtirishni to‘xtatdi. UNRWA komissari Filipp Lazzarini HAMASning Isroil janubiga hujumiga aloqador bo‘lgan bir necha agentlik xodimlarini ishdan bo‘shatishni buyurdi. BMT Bosh kotibi Antoniu Guterrish esa BMTning ichki nazorat xizmatlari boshqarmasi bu borada tekshiruv boshlaganini ma’lum qildi.

Eslatib o‘tamiz, oldinroq Antoniu Guterrish UNRWA’ni moliyalashtirishni to‘xtatgan davlatlarni o‘z qarorlarini qayta ko‘rib chiqishga chaqirgandi. https://qalampir.uz/news/guterrish-garb-davlatlarini-insofga-chak-irdi-96623 
HAMAS esa UNRWA'ga qarshi ayblovlar kampaniyasi uni moliyalashtirishni to‘xtatish va Falastin xalqini ushbu tashkilotning yordamidan mahrum qilish uchun atayin amalga oshirilayotganini aytgandi.