Mamlakatlarimiz oʻrtasidagi munosabatlarning bugungi holati va istiqbollari muhokama qilinib, savdo-iqtisodiy, investitsiyaviy, bank-moliya, madaniy-gumanitar yoʻnalishlarda aloqalarni rivojlantirish masalalari koʻrib chiqildi.

Taʼkidlanganidek, moliyaviy va texnologik sohalarda hamkorlikni kengaytirish uchun ikki davlatning salohiyati yetarli. Bu borada amaliy mexanizm va tashabbuslarni ishga solish, jumladan, savdo vakillarini tayinlash orqali yangi loyihalarni amalga oshirish lozimligi taʼkidlandi.

Т.Axmad Oʻzbekistonga 'GSP Enhanced' umumiy imtiyozlar tizimining kengaytirilgan sxemasining benefitsiari maqomi berilganini alohida qayd etib, Britaniya bozorida talab qilinadigan mahsulotlar eksportini oshirish istiqbollariga toʻxtalib oʻtdi.

Oʻz navbatida Т.Norboyeva Buyuk Britaniya ishbilarmon doiralari vakillarini 2024-yil may oyida boʻlib oʻtadigan Toshkent xalqaro investitsiya forumiga taklif qildi.

Suhbat davomida taʼlim sohasidagi hamkorlikka ham eʼtibor qaratilib, Oʻzbekistonda Buyuk Britaniya yetakchi universitetlarining filiallarini ochish, malakali oʻqituvchilarni jalb qilishning amaliy jihatlari koʻrib chiqildi.

Bugun barcha mamlakatlar kun tartibida iqlim oʻzgarishi masalasi dolzarb boʻlgani inobatga olinib, mazkur yoʻnalishda yaqin hamkorlikni yoʻlga qoʻyish, ayniqsa, qurgʻoqchilik va suv tanqisligiga qarshi kurashish, bunda suv resurslarini boshqarish samaradorligini oshirish yoʻnalishida qoʻshma loyihalarni amalga oshirish boʻyicha fikr almashildi.