Bugun, 16 yanvar kuni taxminan soat 11:30 da Rossiyaning Samara viloyatida o‘zbekistonliklar bo‘lgan avtomashina YTHga uchradi. Bu haqda viloyat prokuraturasi ma’lum qildi.

“Stavropol tumani, Bolshaya Ryazan qishlog‘i yaqinida M-5 Ural avtomagistralining 745-kilometrida ikkita avtomobil ishtirokida yo‘l-transport hodisasi sodir bo‘ldi. Dastlabki ma’lumotlarga ko‘ra,  Lada Largus haydovchisi boshqaruvni yo‘qotib, qarama-qarshi tomonga chiqib ketgan va u yerda yuk mashinasi bilan to‘qnashgan”, deyiladi rasmiy xabarda.

Mahalliy nashrlardan biri esa o‘z manbasiga tayanib, avtohalokatga uchragan  Lada Largus avtomobili ichida 7 nafar O‘zbekiston fuqarosi bo‘lgani va ulardan 3 nafari halok bo‘lganini xabar qilgan. Bildirilishicha, qolgan 4 nafar o‘zbekistonliklar shifoxonaga yotqizilgan.

Eslatib o‘tamiz, 11 yanvar kuni  Rossiyaning Penza viloyatidagi M-5 Ural trassasida yuk mashinasi va mikroavtobus ishtirokida sodir bo‘lgan mudhish yo‘l-transport hodisasi oqibatida 7 nafar O‘zbekiston fuqarosi voqea joyida halok bo‘lgandi. Prezidentning topshirig‘i bilan Penzada halok bo‘lgan o‘zbekistonliklarning jasadlari 13 yanvar kuni Xorazm viloyatiga olib kelingandi.