Yaqin Sharq davlatlari, agar Falastin-Isroil mojarosi ikki davlatning yonma-yon yashashi tamoyili asosida hal etilsa, G‘azo sektorini qayta qurish va rivojlantirishga sarmoya kiritishga tayyor. Bu haqda AQSH Davlat kotibi Entoni Blinken kecha, 9 yanvar kuni Tel-Avivdagi matbuot anjumanida ma’lum qildi.
“Bu safar men juda aniq eshitgan narsalardan biri shundaki, mintaqadagi ko‘plab davlatlar G‘azodagi mojaro tugaganidan keyin turli yo‘llar bilan G‘azoga sarmoya kiritishga tayyor. Ammo buning uchun ular falastinliklarning siyosiy huquqlari tiklanishiga va Falastin davlatining yaratilishiga ishonishi kerak”, deydi Amerika diplomatiyasi rahbari.
Blinken Yaqin Sharqning ko‘plab davlatlari Isroil bilan hamkorlikda mintaqaviy xavfsizlikni ta’minlamoqchi ekanini ta’kidladi.
Ma’lumot uchun, Blinken G‘azoda urush boshlangandan beri mintaqaga qilgan to‘rtinchi safari davomida Turkiya, Gretsiya, Iordaniya, Qatar, BAA va Saudiya Arabistonida bo‘lgandi. Bundan tashqari, Blinken G‘arbiy Sohilga ham borishi rejalashtirilgan. Uning Yaqin Sharqqa safari esa Misrga tashrif bilan yakunlanadi.
Eslatib o‘tamiz, Blinken Isroilga safari avvalida Tashqi ishlar vaziri Israel Kats va Prezident Isxak Gersog bilan gaplashgandi. Blinken Isroil TIV rahbari bilan uchrashuvda G‘azodagi urushdan keyin yahudiy davlati Yaqin Sharq mintaqasi mamlakatlari bilan munosabatlarini yaxshilashi mumkinligini aytdi. Isroil Prezidenti esa Blinkenga Janubiy Afrikaning Isroilni “Genotsid jinoyatining oldini olish va jazolash to‘g‘risidagi konvensiya"ni buzganlikda ayblab, Gaagadagi Xalqaro Sudga bergan da’vosini "dahshatli va kulgili" deb bilishini aytdi.