Avval xabar berganimizdek, shu kunlarda Sogʻliqni saqlash vaziri Amrillo Inoyatov boshchiligidagi mamlakatimiz delegatsiyasi xizmat safari bilan Belarus Respublikasida boʻlib turibdi. 

Tashrifning ikkinchi kuni Minsk shahrida joylashgan N.N.Aleksandrov nomidagi Respublika onkologiya va tibbiy radiologiya ilmiy-amaliy markazi faoliyati bilan tanishuvdan boshlandi.

Taʼkidlash joiz, 64 yillik tarixga ega mazkur markazdagi ilmiy-tibbiy-oʻquv majmuada 10 ilmiy laboratoriya, 20 ta statsionar va 11 ta diagnostika boʻlimi mavjud.

Bugungi kunda ularda jami 1700 dan ziyod malakali xodimlar, shu jumladan, 25 nafardan ortiq tibbiyot va biologiya fanlari doktorlari hamda 12 nafar professor mehnat qilmoqda.

Eʼtiborlisi, bu yerda umumiy gipertremiya, fotodinamik terapiya kabi dunyoda muqobili boʻlmagan noyob davolash usullari qoʻllaniladi.

Markazda oʻrnatilgan zamonaviy diagnostika asob-uskunalari esa hatto eng ogʻir onkologik kasalliklarga ham tez va aniq tashxis qoʻyish imkonini bermoqda.

Sogʻliqni saqlash vaziri Amrillo Inoyatov va markaz rahbariyati oʻrtasida oʻtgan muloqot davomida taʼkidlanganidek, yurtimizda oʻtkazilgan Oʻzbekiston-Belarus tibbiyot va taʼlim kunlari koʻplab yoʻnalishlar qatorida onkologiya sohasidagi oʻzaro hamkorlikni ham yanada mustahkamlashga turtki boʻldi.

Xususan, aksiya doirasida mamlakatimizga Belarusdan bir guruh yuqori malakali onkologlar tashrif buyurib, mahalliy shifokorlar bilan oʻzaro bilim va tajriba almashdi, hamkorlikda murakkab amaliyotlar bajardi.

Uchrashuvda onkologiya sohasida mutaxassislarni oʻqitish, ular uchun ushbu markazda stajirovka va malaka oshirish kurslarini tashkil etish, birgalikda onkologik kasalliklarni davolashning yangi usullarini joriy qilish kabi qator yoʻnalishlarda hamkorlik istiqbollari muhokama qilindi.

Shuningdek, muzokaralar davomida ikki mamlakatning onkologik muassasalari oʻrtasida toʻgʻridan-toʻgʻri aloqalarni yoʻlga qoʻyish boʻyicha kelishuvga erishildi.

Oʻz navbatida, belaruslik mutaxassislar oʻzbekistonlik hamkasblaridan ayrim onkologik kasalliklarni robot texnologiyasi yordamida davolashni oʻrganishga qiziqish bildirdi.