Bugun Korrupsiyaga qarshi kurashish agentligida “Korrupsiyaning oldini olishga qaratilgan innovatsion va zamon talablariga javob beradigan yechimlarni rivojlantirish masalalari” mavzusida akademik doira vakillarining muloqoti tashkil etildi.

Taʼkidlanganidek, korrupsiyaga qarshi kurashish yoʻnalishida amalga oshirilayotgan choralarning samaradorligini oshirishda ilmiy yondashuvning oʻrni muhim. Aynan korrupsiyani keltirib chiqarayotgan sabablarni oʻrganish, tahlil qilish, ularni bartaraf etish boʻyicha asoslangan takliflarga ehtiyoj yuqori. Bu esa mazkur yoʻnalishdagi ilmiy tadqiqotlar, oʻrganishlar koʻlamini oshirishni talab etadi.

Shu maqsadda Korrupsiyaga qarshi kurashish agentligi huzurida akademik doira vakillaridan iborat Ekspertlar guruhi tashkil etildi hamda ushbu muloqot doirasida guruhning taʼsis yigʻilishi oʻtkazildi.

Ekspertlar guruhi faoliyatidan koʻzlangan asosiy maqsad yuqoridagi vazifalarni muvofiqlashtirish va korrupsiyaga qarshi kurashishning ilmiy asoslarini takomillashtirish, sohaga oid ilmiy tadqiqotlarni tashkil etish, shuningdek, Agentlik va ilmiy doira vakillari, ixtisoslashgan taʼlim muassasalari oʻrtasida oʻzaro muloqotni rivojlantirishdan iborat.

Muloqot mobaynida quyidagilar Ekspertlar guruhining asosiy faoliyat yoʻnalishlari etib belgilandi:

— Ochiqlik indeksi platformasining ishlash mexanizmidagi kamchiliklarni tahlil qilish;

— Korrupsiyaga qarshi uzoq, oʻrta, qisqa muddatli, aniq maqsadlarni SWOT tahlil qilish;

— Yoshlarda korrupsiyaga qarshi murosasiz muhitni shakllantirishga oid choralarni belgilash;

— Korrupsiyaga qarshi kurashish hududiy kengashlari faoliyatini tahlil qilish va boshqalar.

Shuningdek, Guruhdan kutilayotgan asosiy natijalar sifatida korrupsiyaviy xatti-harakatlarning rivojlanish tendensiyalari va shakllari, ularning oldini olish boʻyicha ilmiy isbotlangan, innovatsion vositalar, usullar va yechimlarni shakllantirish ekanligi qayd etildi.

Guruh aʼzolari tomonidan ushbu maqsadni amalga oshirish, qolaversa, Guruhni tashkiliy-uslubiy jihatdan qoʻllab-quvvatlash boʻyicha bir qator taklif va tavsiyalar bildirildi.

Shuningdek, yigʻilishda tashkiliy masalalar ham koʻrib chiqildi. Unga koʻra, Ichki ishlar vazirligi Akademiyasi Huquqbuzarliklar profilaktikasi kafedrasi mudiri Tursunov Axtam Salomovich Ekspertlar guruhining raisi etib saylandi.