“Taraqqiyot strategiyasi” markazi ijrochi direktori Eldor Tulyakov Turkiyaning yetakchi “aql markaz”lari Anqara inqiroz va siyosiy tadqiqotlar markazi (ANKASAM) direktori Mexmet Sayfetdin Erol, Strategik fikr instituti (SDE) direktori Guray Alpar hamda “Sohibqiron” strategik tadqiqotlar markazi (SASAM) direktori Mesut Emre Karakoselar bilan uchrashuvlar o‘tkazdi. Bu haqda “Taraqqiyot strategiyasi” markazi Axborot xizmati xabar bermoqda.

Uchrashuvlar avvalida Markaz rahbari E.Tulyakov turkiyalik hamkorlarni mamlakatda amalga oshirilayotgan islohotlar va erishilayotgan natijalar, joriy yil 30 aprel kuni bo‘lib o‘tgan umumxalq referendumi hamda mamlakatda bo‘lib o‘tgan Prezidentlik saylovi va uning o‘tkazilish jarayoni haqidagi ma’lumotlar bilan tanishtirib o‘tdi. 

Shuningdek, tomonlar so‘nggi yillarda O‘zbekiston–Turkiya o‘rtasidagi Strategik hamkorlik aloqalari ikki mamlakat yetakchilarining siyosiy irodasi sabab jadal rivojlanib borayotganligi, xususan buni parlamentlararo, davlat idoralari, ishbilarmon doiralar va tahlil markazlari o‘rtasidagi aloqalarning mustahkamlanib borayotganligi misolida ham ko‘rish mumkinligi ta’kidlashdi.

Jumladan, bu jarayonlar siyosat, xavfsizlik va mudofaa, savdo va iqtisodiyot, investisiya, turizm, energetika, transport, qishloq hamda o‘rmon xo‘jaligi, ta’lim, fan va texnika, sog‘liqni saqlash va boshqa o‘zaro manfaatli sohalardagi hamkorlikni rivojlantirishda yaqqol namoyon bo‘layotganligini aytib o‘tishdi.

Shu bilan birga, tomonlar 2021 yilda imzolangan hamkorlik Memorandumlari doirasida boshlangan o‘zaro manfaatli sohalardagi qo‘shma loyiha, tadbir va tadqiqot ishlarini yanada kengaytirish borasida o‘zaro fikr almashishdi.