Iqlim oʻzgarishi, atrof-muhitning yuqori darajada ifloslanishi odam organizmiga taʼsir qilmasdan qolmaydi. Shu kabi tashqi omillar va turli ichki kasalliklarning rivojlanishi tufayli dermatovenerologik va kosmetologik tibbiy xizmatlarga boʻlgan talab ortmoqda.

Xususan, oʻtgan yili Respublika ixtisoslashtirilgan dermatovenerologiya va kosmetologiya ilmiy-amaliy tibbiyot markazining maslahat poliklinikasiga 59307 nafar bemor murojaat qilgan va bu 2021-yilga nisbatan mingta koʻp koʻrsatkichdir.

Qolaversa, ularning 1362 nafari chet davlatlardan kelgan fuqarolardir.

Oʻtgan yil davomida markaz boʻlimlarida 7548 nafar bemor statsionar sharoitda davolangan.

2021-yilda esa markaz klinikasida jami 6890 bemor statsionar sharoitda muolaja olgan va bu koʻrsatkich 2022-yilda 9,5 foizga ortgan.

Maʼlumot uchun, markaz tarkibida 70 qatnovga moʻljallangan maslahat poliklinikasi, 160 oʻrin-joyga ega 6 ta statsionar, 4 ta klinik va 2 ta yordamchi boʻlim hamda 6 ta laboratoriya faoliyat yuritmoqda.

Muassasada jami 71 nafar shifokor, 155 nafar hamshira va 75 nafar kichik tibbiyot xodimi ishlaydi. Mutaxassislardan 5 nafari professor, 10 nafari fan doktori, 28 nafari fan nomzodi ilmiy darajasiga ega.