Bollivud olamida o‘z o‘rniga ega bir necha mashhur sulolalar bor. Ular orasida Roshanlardan musiqachi va aktyor avlodlar yetishib chiqmoqda. Bollywoodtime nashri Roshanlar sulolasi haqida qiziqarli ma’lumotlar bilan bo‘lishdi.

Roshanlar sulolasi 4 avloddan iborat. Ushbu ajoyib san’atkorlar sulolasining ajdodi — Roshan Lal Nagratx Moxan. Roshan, Bollivud yulduzi Ritik va uning otasi Rakeshning familiyasi emas. Ushbu oilaning barcha a’zolarining haqiqiy familiyasi Nagratx, Roshan esa Ritikning bobosining ismi bo‘lib, u 1948-yilda Mumbayga kino sohasida faoliyatini boshlash uchun kelgan.

Roshan Lal Nagratx 1917-yil 14-iyulda Gujranvalada (hozirgi Pokiston) juda ziyoli va o‘qimishli oilada tug‘ilgan. Bolaligidan musiqani o‘rgangan, turli cholg‘u asboblarini chalgan. Maktabdan so‘ng u Butun Hindiston radiosiga ishga joylashgan va 1940-yillarning oxirida kino sanoatida shon-shuhrat va daromadga ega bo‘lish uchun Bombeyga jo‘nab ketgan.

Uning yo‘li juda uzoq va mashaqqatlarga boy edi. Roshan oradan 10 yil o‘tibgina mashhurlikka erishdi. 1960-yillar uning uchun oltinga teng davr bo‘ldi. Uning xalq va mumtoz musiqani uyg‘unlashtira olishi muvaffaqiyatning sababi edi. Roshan bir nechta musiqiy hitlarni, jumladan Madxubala va Bxarat Bxushan bilan mashhur “Yomg‘irli tun” (1960) ni yaratdi.

Roshan ikki marta oila qurdi. Birinchi rafiqasi haqida ko‘p narsa ma’lum emas, chunki nikoh qisqa muddat davom etdi. 1948-yilda u bengallik qo‘shiqchi va bastakor Ayra (Moytre)ga uylandi. U Bollivud filmlarida kuylagan, shu jumladan “Bebaho sevgi” filmida Lata Mangeshkar bilan ham qo‘shiq ijro etgan. Afsuski, u turmush o‘rtog‘idan ayrilgach, karyerasini tark etishga majbur bo‘ldi. Roshan 1948-yilda yurak xurujidan to‘satdan vafot etdi.

Roshan va Ayraning ikki o‘g‘li — Rakesh va Rajesh Roshan bo‘lib, ular otasining kasbini davom ettirdi. Rajesh ham musiqa o‘qituvchisi, Rakesh esa avvaliga aktyorlik sohasida o‘zini sinab ko‘rdi, keyin esa rejissorlik bilan shug‘ullandi.

Rakesh oilaning eng kattasi. U 1949-yil 6-sentyabrda tug‘ilgan. Bolaligidan u aktyor bo‘lishni orzu qilar edi, lekin institutni tugatishga ulgurmadi, chunki u otasidan ayrilib, uyga qaytib, onasi va ukasini boqish uchun ishlashga majbur bo‘ldi.

Rakesh shunga qaramay orzusini ro‘yobga chiqardi va aktyor bo‘ldi, lekin u katta bu sohada muvaffaqiyatga erisha olmadi, shuning uchun u rejissorlik kursiga o‘tdi va bir nechta mashhur filmlarni suratga oldi: “Qasos o‘ti”, “Kishan va Kanxaya”, “Karan va Arjun”, “Krish” va boshqalar.

Uning ukasi Rajesh Roshan Lal Nagratx 1955-yil 24-mayda tug‘ilgan. U maktabni tamomlashdan oldin ham Bollivud filmlari uchun musiqa bastalagan va 20 yoshida “Juli” (1975) filmi uchun eng yaxshi bastakor sifatida birinchi Filmfare mukofotini olgan. 1987-yildan beri Rajesh akasining barcha filmlariga musiqa bastalagan.

To‘g‘ri, tanqidchi va tomoshabinlar Rakesh Roshanni plagiat uchun yoqtirmaydi, chunki u har doim o‘zining eng mashhur kuylarini boshqa mamlakatlarning taniqli musiqalaridan ko‘chiradi.

Rajesh va Rakeshning ikkitadan farzandi bor. Rajesh rafiqasi Kanchanning Ishan ismli o‘g‘li va Pashmina ismli qizi bor. Rakesh va uning rafiqasi Pinkining Ritik ismli o‘g‘li va Suneyna ismli qizi bor.

Ishan aktyorlik maktabini tamomlagan va 2008-yilda Bollivudda debyut qilmoqchi edi. Xuddi amakivachchasi Ritik kabi Ishan ham yaxshi raqqos. Ammo, Ishan aktyorlik sohasidan ketmadi.

Uning singlisi Pashmina yosh bo‘lsa-da, allaqachon tajribali teatr aktrisasi va Jeff Goldbergning “Jiddiy bo‘lishning ahamiyati” spektaklida rol o‘ynagan. Teatrga qiziqishidan tashqari, Pashmina Roshan Mumbaydagi Barri Jonning aktyorlik maktabida olti oylik kursni tamomlagan va Bollivuddagi debyutiga hozirlik ko‘rmoqda.

O‘tgan yili uning amakivachchasi Ritik Instagram’dagi postida u tez orada aktrisa bo‘lishini ta’kidlagan edi: “Men sen bilan juda faxrlanaman Pashmina! Sen o‘zgacha ruh va g‘ayrioddiy iste’dod egasisan. Sening samimiyliging atrofdagi hamma narsani yoritadi. Ba’zida bu sehrni qayerdan olasan deb o‘ylayman va bir oila ekanligimiz uchun Xudoga shukur qilaman. Sening borligingdan baxtiyormiz va ishonchim komilki, tez orada butun dunyo ham shunday munosabatda bo‘ladi”, — deb yozadi u.

Ritik Roshan — Rakesh Roshanning o‘g‘li. Bugungi kunda u Bollivuddagi eng mashhur aktyor va raqqosalardan biri. Albatta, otasi uni “Sevishingni ayt” muvaffaqiyatli filmida suratga olib, Bollivudga olib kirdi. Bollivudda 20 yildan ortiq vaqtdan beri bo‘lishiga qaramay, Ritik muvaffaqiyatli filmlarda suratga tushishda davom etmoqda.

Ritik aktyor Sanjay Xonning qizi Syuzanna Xonga uylangan edi. Juftlikning 16 yoshli Rexan va 14 yoshli Ridxon ismli ikki o‘g‘li bor. Yigitlar hali maktab o‘quvchisi, ammo kelajakda ular ham aktyor bo‘lishlari mumkin.

Afsuski, Ritik va Syuzanning oilasi aktyorning xiyonati tufayli buzildi. Hozirda u yosh aktrisa Saba Azad bilan uchrashmoqda.

Ritikning yagona singlisi Sunayna ikki marta turmushga chiqqan, ammo uning ikkisi ham ajrim bilan yakunlangan. U birinchi marta 20 yoshida shveysariyalik Ashish Soni bilan turmush qurgan. Uning bu nikohdan Suranika Soni ismli qizi bor. Ajrimdan so‘ng qiz otasi bilan qoldi va onasi keyinchalik biznesmen Moxan Nagarga turmushga chiqdi. Afsuski, ushbu nikoh ham uzoq davom etmadi.

Hozir Suranika ulg‘ayib, onasining oilasi bilan aloqada, bobosi va buvisini ziyorat qilish uchun keladi, amakisi Ritik bilan ham munosabati yaxshi.

Suranika, Rexan va Ridxon Roshan sulolasining to‘rtinchi avlodi, ammo ular o‘z hayotlarini Bollivud bilan bog‘laydimi yoki yo‘qmi, buni vaqt ko‘rsatadi.

Aytgancha, Ritik Roshanning sobiq rafiqasi Syuzanna ham yana bir mashhur ijodkorlar oilasi — aka-uka Sanjay, Feroz, Zinat Aman, Fardin va Zayed Xan bilan bog‘liq.