Namanganda 61-xalqaro gullar festivalining ochilish marosimi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.

Festivalni 200 dan ortiq gullarga burkangan avtokarvon boshlab berdi.

Ularni Namangan shahridagi Xotira xiyoboni oldida minglab namanganliklar, viloyat rahbarlari, chet ellik mehmonlar va diplomatik korpus vakillari kutib oldi.

Avtokarvonning manzilga yetib kelishi va ochilish marosimi Namanganda kuchli yomg‘ir boshlanishiga to‘g‘ri keldi. Biroq ob-havoning bunday keskin o‘zgarishi ham festivalning bayramona kayfiyatiga ta’sir qilmadi.

Festivalning ochilish marosimida viloyat hokimi Shavkat Abdurazzoqov so‘z oldi. U tadbirga uzoq-yaqindan tashrif buyurgan mehmonlar, festivalning yuqori saviyada o‘tishi uchun astoydil mehnat qilgan namanganliklarga minnatdorlik bildirdi.

“Oldinlari viloyat, nari borsa vodiy miqyosida o‘tkazib kelingan gullar bayrami davlat rahbarining tashabbusi bilan xalqaro maqomga ega bo‘ldi. Bunga yarasha tadbirimizga bo‘lgan e’tibor va qiziqish ham yildan-yilga ortib bormoqda. Shu bois bu yil festivalni ikki hafta davomida o‘tkazishga qaror qildik”, — dedi Shavkat Abdurazzoqov.

Dilnoza Kubayeva va Ilhom Abdurahimov olib borgan ochilish marosimining badiiy qismida Alisher Fayz, Ilhom Ibrohimov, Bahrom Nazarov, Hamdam Sobirov, “Havas” guruhi va viloyat san’atkorlarining chiqishlari tinglandi.

Shundan so‘ng ramziy lenta qirqilib, Bobur nomli bog‘da tashkil etilgan kompozitsiyalar bilan tanishuv boshlandi. Mehmonlar viloyatning shahar-tumanlari, korxona-tashkilot va kompaniyalari tomonidan taqdim etgan ko‘rgazmalarni qiziqish bilan ko‘zdan kechirdi.

Ushbu jarayonlarni xorijiy, markaziy va mahalliy gazetalar, telekanallar, elektron nashrlarning o‘nlab vakillari yoritib bordi. Bu borada ayniqsa noqulay ob-havo sharoitiga qaramay vazifasini sidqidildan bajargan foto va teleoperatorlar faoliyati alohida e’tirof etildi.

Namangandagi 61-xalqaro gullar festivali davom etmoqda. Bayramga Qoraqalpog‘iston respublikasi, Toshkent shahri va viloyatlar hamda qo‘shni mamlakatlardan kelayotgan mehmonlar oqimi ortib bormoqda.