O'zbekiston ilk bor EOIK yig'ilishida ishtirok etdi

TOShKENT, 31 yanv — Sputnik. Evroosiyo iqtisodiy komissiyasi (EOIK) Kengashining shu yil 29 yanvar kuni onlayn o'tkazilgan navbatdagi yig'ilishida Evroosiyo iqtisodiy ittifoqi (EOII) da kuzatuvchi maqomini olgan mamlakat sifatida birinchi marta O'zbekiston vakili ishtirok etdi.

© Sputnik / Tabildi Kadirbekov

O'zbekiston ilk bor EOII hukumatlararo kengashi yig'ilishida ishtirok etadi

EOIK yig'ilishida Qozog'iston bosh vazirining birinchi o'rinbosari, EOII raisi A.Smailov, Rossiya bosh vazirining o'rinbosari A.Overchuk, Qirg'iziston bosh vaziri vazifasini bajaruvchisi A.Novikov, Belarus bosh vazirining o'rinbosari S.Petrishenko, Armaniston bosh vazirining o'rinbosari M.Grigoryan va EOIK Kengashi raisi M.Myasnikovich qatnashdi.

Yig'ilishda O'zbekiston nomidan bosh vazirning o'rinbosari, investitsiyalar va tashqi savdo vaziri S.Umurzakov qatnashdi.

O'zbekiston delegatsiyasi rahbari o'z nutqida kuzatuvchi mamlakat maqomidagi O'zbekiston va EOII o'rtasidagi hamkorlikning asosiy yo'nalishlarini belgilab berdi. Teng huquqlilik, o'zaro manfaatdorlik va bir-birining manfaatlarini hisobga olish tamoyillari asosida konstruktiv hamkorlik qurishning ahamiyati qayd etildi.

Yig'ilish kun tartibiga savdo-iqtisodiy, investitsiyaviy va sanoat kooperatsiyasining keng ko'lamli masalalari kiritildi. Mashinasozlik, energetika, elektrotexnika, to'qimachilik va farmatsevtika tarmoqlari, qishloq xo'jaligi kabi ustuvor yo'nalishlarda sanoat kooperatsiyasini mustahkamlash muhimligiga alohida eʻtibor qaratildi.

Taʻkidlanishicha, o'tgan to'rt yil mobaynida O'zbekiston va EOII mamlakatlari o'rtasidagi savdo hajmi 75 foizga o'sgan. Bugungi kunda O'zbekiston tashqi savdo aylanmasining 30 foizdan ortig'i EOII davlatlariga to'g'ri keladi.