O‘zbekistonda 15-fevraldan valyuta oldi-sotdi operatsiyalari tartibi o‘zgaradi

O‘zbekiston Markaziy banki ichki valyuta bozorida valyuta oldi-sotdi operatsiyalarini takomillashtirish to‘g‘risidagi qarorni qabul qildi.

Qarorga muvofiq, 2021-yilning 15-fevralidan boshlab:

• O‘zbekiston respublika valyuta birjasida savdo sessiyalari amaldagi “fiksing” usulidan “koll auksion” va ikki tomonlama uzluksiz auksion “metching” savdo usullariga o‘tkaziladi.
• Valyuta birjasida valyuta oldi-sotdisi bo‘yicha savdo sessiyalari soat 10:00 dan 15:00 gacha “Onlayn platforma” orqali amalga oshiriladi.
• Valyuta birjasida valyuta oldi-sotdisi bo‘yicha hisob-kitoblarning hozirda mavjud T+0 (bugungi ish kuni) shaklidan T+1 (keyingi ish kuni) shakliga o‘tkaziladi.
• Tijorat banklarining valyuta birjasi savdolarida mijozlar nomidan ishtirok etishi bekor qilinadi (endi to‘g‘ridan to‘g‘ri valyuta pozitsiyasi orqali amalga oshiriladi).

Bundan tashqari, Markaziy bankning valyuta operatsiyalari bo‘yicha buxgalteriya hisobi, statistik va boshqa hisobotlarni yuritish, shuningdek, bojxona va boshqa majburiy to‘lovlarni hisoblash uchun chet el valyutalarining so‘mga nisbatan rasmiy kurslari kunlik belgilanadi va har bank ish kuni soat 16:00 da Markaziy bank rasmiy sayti va ijtimoiy tarmoqlardagi sahifalarida e’lon qilib boriladi.

“Amalga oshirilayotgan o‘zgarishlar ichki valyuta bozorining infratuzilmasini takomillashtirish, valyuta kursining shakllanishida tijorat banklarining rolini yanada oshirish hamda tadbirkorlarning mablag‘larini zarur bo‘lgan valyutalarga tezkor ravishda almashtirish imkoniyatlarini yaratadi”, — deyiladi Markaziy bank xabarida.

Markaziy bank raisi o‘rinbosari Behzod Hamroyev Markaziy bank tomonidan 2021-yil amalga oshirilishi maqsad qilingan asosiy rejalardan biri – milliy valyutaning chet el valyutasiga qaramligini kamaytirish va inflyatsiya darajasining 10 foizdan oshib ketmasligini ta’minlash ekanligini bildirgandi. Shuningdek, tadbirkorlar tijorat banklaridan onlayn tarzda buyurtma berib to‘g‘ridan to‘g‘ri valyuta xarid qilish imkoniyatiga ega bo‘ladi.

Shavkat Mirziyoyevning Oliy Majlisga yo‘llagan Murojaatnomasida 2021-yilda narx-navo o‘sishini 10 foizdan oshirmaslik Markaziy bank va hukumatning asosiy vazifasi bo‘lishi kerakligi ta’kidlangandi.