2009-yilda efirga uzatilgan hamda tomoshabinlar mehrini qozongan “Tutash taqdirlar” seriali rejissori Zamira Begimqulova hamda bosh rollar ijrochilari Ja’far Mo‘minov va Nilufar Hamidova MY5 telekanalining “Omon-omon” ko‘rsatuvida mehmon bo‘ldi.

Ma’lum bo‘lishicha, serial ijodkorlari o‘tgan vaqt ichida biron marta ham birga yig‘ilmagan. Serialdagi Azizbek rolini gavdalantirgan aktyor Ja’far Mo‘minov hozirda AQShda yashaydi.

“Ja’far bilan ‘Gulxan atrofida’, ‘Tutash taqdirlar’ va ‘Opa-singillar’ seriallarida birga ishladik. Ammo ‘Opa-singillar’ oxiriga yetmasdan, menga ham aytmasdan Amerikaga ketib qoldi. Ssenariyga biroz o‘zgartirish kiritib, vaziyatdan chiqib ketdik”, — deydi serial rejissori Zamira Begimqulova.

“Zamira opa bilan 8 yildan buyon ko‘rishmasak-da, Facebook tarmog‘i orqali gaplashib turamiz. Ammo Nilufarni ko‘rmaganimga roppa-rosa 10 yil bo‘ldi. Kuni kecha uy telefoniga qo‘ng‘iroq qilib, arang bog‘lanishga erishdik”, — deydi serialdagi Azizbek rolini gavdalantirgan Ja’far Mo‘minov.

“Ijodiy guruhni chindan ham sog‘indim, serial orqali qanchadan-qancha muxlislar ko‘nglidan joy olganmiz. Hattoki, partnyorim Jafar bilan ko‘chada yursak, yoshi katta onaxonlar baxt tilab, duo qilgan vaqtlar ham bo‘lgan”, — deydi aktrisa Nilufar Hamidova.

Uchrashuv davomida serialdan o‘rin olgan to‘y sahnasidagi qiziqarli voqealar ham aytib o‘tildi.

“Eng qizig‘i, Nilufar ikkimizning to‘yimiz kuni, kelin-kuyov bo‘lish kartinasida Nilufarning hayotdagi turmush o‘rtog‘i va ikki farzandi tashrif buyurgan edi. Haqiqatan ham, ajoyib bo‘lgan edi”, — deya yodga oldi aktyor.

Serialdagi uzun sochli kelin ayni damda sochini kesib yuborgan, uning aytishicha, buning sababi odamlarning nazari. “Hatto ko‘cha-ko‘yda sochi o‘zinikimi yoki ulamami, deb tortib ko‘radiganlar ham uchragan”, — deya qo‘shimcha qiladi aktrisa.