«Yegandek bo‘ldim» nomli masjid haqida eshitganmisiz?!

Istanbulning Fotih mintaqasida shu nomdagi masjid bor. Bu turkchada «Sanki yedim» bo‘ladi. Bu g‘aroyib nom ortida ajib bir hikoya bor. Hikoya zamirida esa ajoyib bir ibrat mujassam.

Naql qilishlaricha, Fotih mintaqasida Xayriddin ismli bir kishi istiqomat qilar edi. U qachon bozorning oldidan o‘tayotib nafsi mevanimi, go‘shtnimi, halvonimi xohlab qolsa, «egandek bo‘ldim» deb shunga yetadigan pulni bir sandiqqa tashlab qo‘yaverar ekan.

Oylar, yillar o‘tsa-da, u o‘zini lazzatli taomlardan mahrum qilib boraveribdi. Sandiq esa sekin-asta pulga to‘lib boraveribdi. Nihoyat bu pulga mahallasida bir kichkina masjid qurib beribdi. Mahalla ahli bu kishining qissasidan xabardor bo‘lgach, masjidni «yegandek bo‘ldim» deb nomlashibdi. Bu masjid XVIII asrda Usmoniylar davrida bino qilingan. Unda 200 nafar namozxon namoz o‘qiy oladi.

Agar, Istambul tomonlarga yo‘lingiz tushsa va Fotih mintaqasiga borsangiz, eski uylar orasida kichkina masjidni ko‘rasiz. Bu masjid Xayriddin afandining ixlosiga, zuhdiga dalolat qiladi. U kishi faqirligiga qaramasdan, o‘zidan abadiy hayoti uchun doimiy ajr borib turadigan go‘zal sadaqayi joriya qoldirdi. Unga dunyo lazzatlari «meni yeng» deb nido qilganida, ularga qarab «yegandek bo‘ldim» deb javob qildi. Agar bunday javob qilmaganida, bitta masjidni yeb yuborgan bo‘lar edi.  

Go‘zal JAFAROVA tayyorladi.