Tibbiyotga byudjetdan ajratiladigan yillik mablag‘ hajmi 2 baravarga oshirilib, 6 mlrd dollarga yetkaziladi

Foto: Prezident matbuot xizmati

Yurtimizda o‘rtacha umr davomiyligini hozirgi 73 yoshdan kelgusida 78 yoshga yetkazish bo‘yicha barcha imkoniyatlarni ishga solinadi. Bu haqda Shavkat Mirziyoyev o‘zinig saylovoldi dasturida ma’lum qilgan.

Buning uchun, 2030 yilga qadar:

onalar va bolalar o‘limi, bolalar o‘rtasida irsiy kasalliklarni kamida 2 barobarga qisqartirish;
onkologiya, yurak-qon tomir, diabet, nafas yo‘llari va yuqumli kasalliklar bo‘yicha erta o‘limni esa, 2,5 barobar kamaytirish asosiy vazifa bo‘ladi.
Bunda:

120 ming nafar onkologiya, 350 ming nafar diabet, 1,5 million yurak-qon tomir kasalligi bor bemorlar to‘liq qamrab olinadi;
“Gepatit S” kasalligini 100 foiz davlat hisobidan davolash yo‘lga qo‘yiladi;
“tuberkulyoz” bilan kasallanish darajasi yuz ming aholiga nisbatan hozirgi 34 nafardan keskin kamaytirishga erishiladi.
Shu bilan birga, kelgusi yildan birlamchi bo‘g‘in orqali eng ko‘p uchraydigan 10 ta kasallikni davolash va 6 ta tibbiy xizmatdan iborat kafolatlangan tibbiy paket aholiga bepul taqdim etiladi.

Onkologik bemorlar hayotini saqlab qolish maqsadida, mamlakatda ilk bor o‘zak hujayralarini transplantasiya qilish yo‘lga qo‘yiladi. Bu boradagi xarajatlar ehtiyojmand oilalar farzandlari uchun to‘liq davlat hisobidan qoplanadi.

Tug‘ish yoshidagi va homilador ayollar, bolalarga 7 turdagi vitaminlar, yod va foliy kislotasini bepul tarqatish kelgusi yillarda ham davom ettiriladi.

Sog‘liqni saqlash tizimi to‘liq raqamlashtiriladi va tibbiy sug‘urta tizimi joriy qilinadi. 

2030 yilga qadar tibbiyotga byudjetdan ajratiladigan yillik mablag‘ hajmi 2 karra oshirilib, 6 milliard dollarga yetkaziladi.