Oʻzbekiston-Singapur turizm yoʻnalishi tadbirkorlari ochiq muloqoti oʻtkazildi

24-may kuni Toshkent shahrida Madaniyat va turizm vazirligi tashabbusi bilan Oʻzbekiston-Singapur turizm yoʻnalishi tadbirkorlari oʻrtasida ochiq muloqot tashkil etildi.

Singapur Respublikasi Prezidenti Halima Yaqubning mamlakatimizga ilk davlat tashrifi doirasida tashkil etilgan tadbirda singapurlik turoperatorlar va OAV vakillaridan iborat delegatsiyasi hamda mahalliy turizm sohasi vakillari bilan B2B uchrashuv oʻtkazib, ikki tomonlama hamkorlik aloqalarini rivojlantirish oʻzaro sayyohlar oqimini koʻpaytirish borasida fikr almashishdi.

Uchrashuvni Oʻzbekiston Respublikasi Madaniyat va turizm vazirining birinchi oʻrinbosari U.Azamov kirish soʻzi bilan ochib berdi va ikki mamlakat oʻrtasidagi madaniyat va turizm sohasida aloqalarni mustahkamlash yoʻlida olib borilayotgan saʼy-harakatlar toʻgʻrisida alohida toʻxtalib oʻtdi. Jumladan, kelgusida Singapurning boy turistik salohiyatidan kelib chiqib, Oʻzbekistonga ushbu davlatning yetakchi turizm sohasi vakillari va OAVlarini tashrifini tashkillashtirish borasida ham soʻz yuritildi.

Shundan soʻng ikki davlat turoperatorlari oʻrtasida B2B uchrashuvlar oʻtkazildi va hamkorlik aloqalarini oʻrnatish boʻyicha yangi qadamlar qoʻyildi. Bugungi kunda Oʻzbekiston sayyohlik bozorida oʻz xizmatlarini koʻrsatib kelayotgan bir qator tur kompaniyalar (“Protravel”, “East Asia Point”, “Orient Mice DMC”, “Asialuxe”, “Mercury Tour”, “Sitara International”, “Peopletravel”, “Grand Evroasia Group”, “Sanat Travel”) va Singapurning (“EU Holidays”, “Pegasus Travel Management”, “Green Island Tours”, “PlanTrip”) bir guruh turoperatorlari oʻrtasida hamkorlik istiqbollari muhokama qilindi.

Xabaringiz bor, shu kunlarda Singapur Respublikasi bilan madaniy aloqalarni mustahkamlash hamda ushbu davlatdan mamlakatimizga sayyohlar oqimini oshirish maqsadida Madaniyat va turizm vazirligi tomonidan Singapurning sayyohlik agentliklari milliy assotsiatsiyasi (NATAS) boshchiligida Singapurning yetakchi sayyohlik kompaniyalari hamda ommaviy axborot vositalari vakillari uchun info-tur tashkil etilmoqda.