Shimoliy Koreya yetakchisining singlisi, KXDR Markaziy qo'mitasi rahbari o'rinbosari Kim E Chjon AQSh va Janubiy Koreyaning Pxenyanning raketa sinovlariga aralashish bo'yicha har qanday harbiy urinishini KXDR urush eʻlon qilish sifatida ko'rishi haqida ogohlantirdi.

"Agar strategik qurollarni AQSh yurisdiktsiyasidan tashqaridagi ochiq dengizlar va mintaqada, atrofdagi davlatlar xavfsizligiga hyech qanday zarar yetkazmasdan sinovdan o'tkazishimiz ortidan to'xtatib turish kabi harbiy reaktsiya kuzatilsa, bu KXDRga ochiq-oydin urush eʻlon qilingani bo'ladi", dedi Kim E Chjon Koreya markaziy axborot agentligi tomonidan eʻlon qilingan bayonotda.

Uning so'zlariga ko'ra, "namoyishli harbiy harakatlari" va oxirgi paytlarda "qabul qilib bo'lmaydigan chegara"ga yetgan Vashington hamda Seulning ifodalari Pxenyanning "ajralmas reaktsiyasi" uchun sharoit yaratadi.

"Avval tushuntirilganidek, biz AQShning notinch harbiy faoliyati, Janubiy Koreya qo'g'irchoq harbiy kuchlari harakatini kuzatib boramiz va qarorimizga muvofiq istalgan vaqtda tegishli, tezkor va bostiruvchi choralar ko'rishga doimo tayyormiz", dedi Kim E Chjon.

"AQSh va Janubiy Koreya vaziyatni yanada og'irlashtiradigan so'z va harakatlardan tiyilishi kerak", deya qo'shimcha qildi u.

Avvalroq AQShning Hind-Tinch okeani qo'mondonligi rahbari admiral Jon Akvilino agar Shimoliy Koreya Tinch okeani tomon qitʻalararo ballistik raketa uchirsa, AQSh uni darhol tutib olishini maʻlum qilgandi.