8 nafar o'zbekistonlik bokschi yoshlar mundiali finalida jang qiladi

Ispaniyaning La Nusiya shahrida bo'lib o'tayotgan boks bo'yicha yoshlar o'rtasidagi Jahon chempionati tobora o'z poyoniga yetib bormoqda. 23 noyabr kungi janglardan so'ng, turnirning finalchilari nomi maʻlum bo'ldi.

O'zbekiston jamoasidan 8 nafar bokschi mundialning hal qiluvchi bahsiga yo'llanmani qo'lga kiritdi. Ayollar o'rtasida Gulsevar G'aniyeva, Aziza Zokirova va Oltinoy Sotimboyeva o'z vazn toifalarida oltin medal uchun bahslarga kirishadi.

Erkaklar o'rtasida Javohir Ummataliyev, To'rabek Xabibullayev, Baxtiyor Asadov, Fazliddin Erkinboyev va Rahmatillo Boymatov o'z janglarida g'alabaga erishdi.  

Xo'janazar Nortojiyev va Sahobat Husanova musobaqaning bronza medali bilan cheklanadigan bo'ldi.

Maʻlumot uchun, yoshlar mundialining final janglari 25 va 26 noyabr kunlari o'tkaziladi.