Yaponiya hukumati yetti yil ichida birinchi marta energiya tejash rejimini joriy etib, aholi va korxonalarni yoz uchun isteʻmolni oqilona kamaytirishga chaqirdi. Bu haqda "Kёdo" axborot agentligi maʻlum qildi.

"So'nggi paytlarda mamlakatda issiq havo o'rnatilmoqda, ayrim hududlarda havo harorati 35 darajaga yetdi. Shu sababli elektr energiyasiga bo'lgan talab oshgan, biroq ayni paytda yetkazib berishni oshishi, shuningdek issiqlikning pasayishi kutilmayapti", deyiladi xabarda.

Energiyani tejash talabiga issiq urishining oldini olish uchun konditsionerlar va boshqa elektr jihozlaridan foydalanishni taqiqlash va cheklash kirmaydi. Ammo ikkilamchi maqsadlarda, yaʻni reklama belgilari, do'konlarni ortiqcha yoritish va vitrinalarni yoritish, texnika do'konlarida televizorlarni maqsadsiz yoqib qo'yish uchun elektr energiyasini sarflash mumkin emas. 

Yaponiya poytaxti va boshqa sakkizta prefekturada joriy yilning 27 iyun kunidan boshlab to'rt kun davomida iyun oyi uchun g'ayritabiiy issiqlik kuzatildi va elektr tarmoqlaridagi yuklanish haqida aholiga ogohlantirish berildi. Shu kunlarda ushbu zonaning bir qator hududlarida 40 darajagacha harorat qayd etilgan. Kecha, 30 iyun kuni Tokioda iyun oyi uchun rekord bo'lgan 36 darajadan yuqori harorat kuzatildi.

Energiya narxining oshishi, energiyaning "toza" turlariga o'tish rejalarini inobatga olgan holda, issiqlik elektr stantsiyalarining qisqarishi, elektr energiyasi taʻminoti barqarorligidan xavotirlar kuchayishi fonida elektr energiyasi taʻminoti bilan bog'liq muammolar yuzaga keldi.

Yaponiya Iqtisodiyot vazirligi 2011 yildan beri birinchi marta joriy yilning yoz mavsumida prognoz qilinayotgan energiya tanqisligi sababli mamlakatda energiya isteʻmoli darajasi haqida hisobot bera boshladi.

Kelgusi hafta uchun maʻlumotlar juma kunlari chiqariladi. Bu amaliyot oldin faqat 2011 yilda, kuchli zilzila va tsunamidan so'ng, "Fukusima-1" AESda avariya sodir bo'lgan va mamlakat elektr energiyasining uchdan bir qismini taʻminlaydigan barcha atom elektr stantsiyalari to'xtatilganda amalga oshirilgan. Elektr taʻminoti holati to'g'risida xabar berish energiyani oqilona tejashga yordam berishi kutilmoqda.

Yoz mavsumida harorat ko'tarilishi tufayli, anʻanaviy ravishda ish joylari, uy, transport va do'konlarda konditsionerlarning ishlashi uchun zarur bo'lgan elektr energiyasi faol isteʻmol qilinadi. Hukumat hisob-kitoblariga ko'ra, harorat o'zgarmasa, mamlakatni elektr energiyasi bilan taʻminlashda katta qiyinchiliklar yuzaga keladi.

Oynisaxon Abdullayeva