Qirg'iziston 10 yillik tanaffusdan keyin kazino va qimor o'yinlarini legallashtirmoqda. Bundan maqsad – davlat byudjyetiga qo'shimcha mablag'larni jalb etish. Bu haqda mamlakat Prezidenti Sadir Japarov imzolagan "Qirg'iziston Respublikasida qimor o'yinlari to'g'risida"gi va "Qimor o'yinlari masalalari bo'yicha ayrim qonun hujjatlariga o'zgartishlar kiritish to'g'risida"gi qonunlarida belgilangan. 

Kazino to'g'risidagi qonunda qimor faoliyati subʻyektlari Qirg'iziston Respublikasi qonunchiligida belgilangan tartibda ro'yxatdan o'tgan yuridik shaxslar, shu jumladan xorijiy shaxslar ekanligi belgilab qo'yilgan.

Vakolatli davlat organi tomonidan 10 yil muddatga beriladigan litsenziya asosida faqat masʻuliyati cheklangan jamiyat yoki yopiq aktsiyadorlik jamiyati shaklidagi yuridik shaxslar qimor faoliyati bilan shug'ullanish huquqiga ega. Litsenziyalar berish Vazirlar Mahkamasi tomonidan belgilanadigan tartibda pullik asosda amalga oshiriladi.

Shu bilan birga, qimor o'yinlari muassasasi bolalar bog'chalari, maktablar, universitetlar, boshqa taʻlim muassasalari, tibbiyot va diniy muassasalar, madaniyat muassasalari, shuningdek turar-joy binolarida joylashgan bo'lishi mumkin emas.

Bundan tashqari, qonun Qirg'iziston Respublikasi fuqarolari, 21 yoshga to'lmagan chet el fuqarolari, muomalaga layoqatsiz chet el fuqarolari qimor o'yinlarining mijozlari bo'la olmaydilar.

2022 yilda 1 ta o'yin stoli uchun bazaviy stavka 750 ming som, 2023 yilda 1 million som, 2024 yildan soliq davri – bir kalendar oy uchun 1 million 250 ming somni tashkil etadi.