Meksikaning Varekrus shahri mezbonlik qilgan para taekvondo boʻyicha jahon chempionatining soʻnggi kuni ham vakillarimiz uchun muvaffaqiyatli kechdi.

Jumladan, erkaklar oʻrtasida -80 kg vazn toifasida Asad Toshtemirov oltin, -70 kg vazn toifasida Javohir Aliqulov kumush medalni terma jamoamiz hisobiga qoʻshtirib qoʻydi.

Eslatib oʻtamiz, musobaqaning dastlabki kunida ayollar oʻrtasida -47 kg vazn toifasida Ziyoda Isoqova oltin, erkaklar oʻrtasida -58 kg vazn toifasida Lutfullo Qodirov bronza medalini qoʻlga kiritgan edi.

Shu tariqa 2 ta oltin, 1 ta kumush va 1 ta bronza, jami 4 ta medal qoʻlga kiritgan terma jamoamiz sayyoramizning 72 davlati ishtirok etgan dunyo birinchiligida umumjamoa hisobida 1-oʻrinni qoʻlga kiritib, tarixiy natijani qayd etishdi.

Yana bir eʼtiborli jihati, terma jamoamiz murabbiyi Bobur Qoʻziyev jahon chempionatining eng yaxshi murabbiyi deb topildi va maxsus kubok bilan taqdirlandi.