Oʻzbekiston yoshlar ittifoqi Markaziy Kengashi, “Yoshlar – kelajagimiz” jamgʻarmasi, “Ziyo forum” fan-taʼlimni rivojlantirish jamgʻarmasi vakillaridan iborat Oʻzbekiston delegatsiyasi Rossiya federatsiyasining Rostov-Don shahrida boʻlib oʻtgan Yevroosiyo iqtisodiy Kengashiga aʼzo davlatlarining Yoshlarni oʻzini-oʻzi boshqarish organlari Assotsiatsiyasi I Syezdida ishtirok etdi.

—Mazkur Syezd Yevrosiyo iqtisodiy Kengashiga aʼzo davlatlarning yoshlar jamoat tashkilotlari va kuzatuvchilari oʻrtasidagi xalqaro hamkorlikni rivojlantirishga qaratilgan, – deydi Oʻzbekiston yoshlar ittifoqi Markaziy Kengashi raisi v.v.b Shavkat Zayniddinov. —Tashrifimiz mobaynida yoshlar tadbirkorligini rivojlantirish, taʼlim va madaniy-maʼrifiy tadbirlarni oʻtkazish boʻyicha oʻzaro fikr-mulohazalar yuritdik. Shuningdek,yoshlar siyosati,ekologiya, turizm, ommaviy axborot vositalari sohalariga doir loyihalarimiz taqdimotini oʻtkazdik.

Syezd doirasida Armaniston, Qozogʻiston, Qirgʻiziston, Rossiya va Oʻzbekiston yoshlar tashkilotlari oʻrtasida davra suhbati boʻlib oʻtdi. Unda yil yakuniga qadar Yevrosiyo iqtisodiy Kengashiga aʼzo davlatlarining Yoshlarning oʻzini-oʻzi boshqarish organlari Assotsiatsiyasi yoʻl xaritasi loyihasi muhokama qilindi. Ekspert komissiyasi loyiha hujjatlariga Oʻzbekiston delegatsiyasining yoshlar turizmi va yoshlar tadbirkorligini rivojlantirish boʻyicha takliflari kiritildi.

Tadbir yakunida mamlakatlarning barqaror rivojlanishi jarayonida yoshlarning fuqarolik ishtiroki, shuningdek, yoshlarning mamlakatlararo samarali hamkorligiga koʻmaklashish boʻyicha qoʻshma ikki tomonlama tadbirlarni amalga oshirish maqsadida Oʻzbekiston yoshlar ittifoqi Markaziy Kengashi bilan Rossiya Federatsiyasi Yoshlar hukumatlari assotsiatsiyasi va Qirgʻiziston Respublikasi Birlashgan yoshlar tashkiloti oʻrtasida oʻzaro hamkorlik bitimlari imzolandi.

—Hamkorlik bitimlari orqali ikki mamlakat yoshlari oʻrtasidagi doʻstona aloqalarni mustahkamlash, oʻzaro fikr almashish asosida mamlakatlararo yoshlar masalalari sohasidagi hamkorlikni qoʻllab-quvvatlashni maqsad qilganmiz, – deydi Oʻzbekiston yoshlar ittifoqi Markaziy Kengashi Xalqaro aloqalar boʻlimi boshligʻi Denis Kim. —Hamkorlik doirasida ilmiy-amaliy konferensiyalar, forumlar, seminarlar tashkil etishni ham kelishib oldik.