Ijtimoiy tarmoqlarda Jizzax shahar Obodonlashtirish boshqarmasi «it ovlov brigadasi» tomonidan shahar ko'chalarida 7 dona it otib o'ldirilgani haqida tarqalgan xabarlar yuzasidan Ekopartiya Jizzax shahar Kengashi tomonidan o'rganish olib borildi.

Maʻlum bo'lishicha, shaharning «Olmazor» mahalla fuqarolar yig'ini hududida daydi itlarning haddan ziyod ko'payib ketgani, kechki paytlarda mahalla ahlining ko'chada yurishining imkoni bo'lmay qolgani, itlar odamlarga hujum qilishi kabi holatlar kuzatilgan.

«Olmazor» mahallasi fuqarolari murojaatlariga asosan shu yilning 8 avgust kuni shahar Obodonlashtirish boshqarmasi «It ovlov» brigadasi, Jizzax viloyat IIB boshqarmasi PPX va JTSB Karantin guruhi, shahar veterinariya bo'limi hodimlari ishtirokida qo'shma tadbir o'tkazilgan.

Tadbir davomida mahallaning Navro'z ko'chasidan 2 ta, shahar IIB binosi oldidan 2 ta, ko'p kavatli turar joy binolari atrofidan 2 ta hamda Uchariq ko'chasidan 1 ta daydi itlar belgilangan tartibda ovlanib, shahar chekkasida joylashgan chiqindixona hududida zararsizlantirilgan. 

Eslatib o'tamiz, maʻmuriy javobgarlik to'g'risidagi kodeksning 111-moddasiga ko'ra, hayvonlarga nisbatan shafqatsiz munosabatda bo'lish ularning o'limiga yoxud mayib bo'lishiga olib kelsa, xuddi shuningdek hayvonlarni qiynash, BHMning bir baravaridan uch baravarigacha miqdorda jarima solishga sabab bo'ladi.