AQSh sudi shu yilning yanvar oyida Donald Tramp tarafdorlarining Kapitoliy binosiga bostirib kirishida ishtirok etgan Florida fuqarosini 8 oylik qamoq jazosiga hukm qildi. Bu haqda Associated Press xabar berdi.

Bu Vashingtonda yanvar oyida sodir etilgan tartibsizliklar ishtirokchilariga nisbatan o‘qilgan birinchi qamoq hukmi. G‘alayon ishtirokchisi Pol Allard Xojkins aybiga iqror bo‘lgan va o‘z xatti-harakatlaridan uyalishini aytgan.

Iyun oyida AQShda mazkur ish bo‘yicha birinchi hukm chiqarilgandi, ammo ayblanuvchi qamoqqa yuborilmagan.

Pol Xojkins AQSh prezidentligiga saylov natijalarini tasdiqlash davomida rasmiy jarayonga to‘sqinlik qilishda aybdor deb topildi. Avf etish to‘g‘risidagi kelishuvga muvofiq u AQSh Moliya vazirligiga 2000 dollar to‘lashga rozi bo‘ldi, shundan so‘ng Xojkins yanada og‘ir ayblovlardan, jumladan, buzg‘unchilik va bezorilik ayblovidan ozod qilindi.

Prokuratura ayblanuvchi uchun 18 oy muddat so‘ragan. Ammo AQSh okrug sudyasi Rendolf Moss ayblanuvchi hech kimga hujum qilmagani yoki davlat mulkini buzmagan sababli unga qisqaroq muddat berish mumkinligini aytgan.

Qayd etilishicha, kelgusida boshqa sudlar tartibsizliklarning boshqa yuzlab ishtirokchilari to‘g‘risida qaror qabul qilishda ushbu hukmni yo‘nalish qilib olishi mumkin.

Kapitoliyga hujum qilishda hammasi bo‘lib 500 dan ortiq odam ayblangan.

Eslatib o‘tamiz, 6-yanvar kuni AQSh Kongressi a’zolari Donald Trampning prezidentlik saylovlarida mag‘lub bo‘lganini tasdiqlash uchun yig‘ilgan vaqtda Trampning tarafdorlari Kongressga bostirib kirgan. Politsiya bir necha soat o‘tibgina namoyishchilarni Kapitoliydan haydab chiqarishga muvaffaq bo‘lgan. Huquq-tartibot organlari xodimlari o‘qotar qurol, dubinka, ko‘zdan yosh oqizuvchi gazdan foydalangan. Kapitoliyning xavfsizlik xodimi bilan birgalikda, besh kishi halok bo‘lgan. Tartibsizlikdan keyin federal qidiruv bo‘limi namoyish ishtirokchilariga qarshi 160 dan ortiq ish ochgan.

AQSh hukumatining xabar berishicha, Kapitoliyga qilingan hujum natijasida tarixiy ahamiyatga ega san’at asarlari va mebellar zarar ko‘rgan.

Avvalroq Kapitoliyni ta’mirlash uchun 30 million dollar talab etilishi ma’lum bo‘lgandi.