Avval xabar berilganidek, O‘zbekiston Prezidentining Ko‘ksaroy qarorgohida 30-mart kuni Vengriya bosh vaziri Viktor Orbanni rasmiy kutib olish marosimi bo‘lib o‘tdi. Marosimdan avval prezident Shavkat Mirziyoyev va uning rafiqasi Ziroatxon Mirziyoyeva Vengriya bosh vaziri Viktor Orban va uning turmush o‘rtog‘i Aniko Levai bilan birga esdalik uchun suratga tushdi.

Shundan so‘ng rasmiy marosimdan keyin tashkil etilgan tor doiradagi uchrashuvda Prezident Shavkat Mirziyoyev mehmonni O‘zbekistonga tashrifi bilan qutlab, bu ikki davlat o‘rtasidagi aloqalarda yangi davrni boshlab berishini ta’kidlagan. O‘z navbatida, Viktor Orban tashrifidan mamnunligini bildirib, Vengriya O‘zbekiston bilan hamkorlikni kengaytirishdan manfaatdor ekanini qayd etgan.

Rasmiy muzokaralar ikki mamlakat rasmiy delegatsiyalari ishtirokida davom ettirildi.  Tadbirda ikki tomonlama hamkorlik borasida hali ishga solinmagan juda katta imkoniyatlar borligi ta’kidlangan. Shu sababli asosiy e’tibor savdo-iqtisodiy, investitsiyaviy va moliyaviy aloqalarni yanada rivojlantirish masalalariga qaratilgan. Shavkat Mirziyoyev mamlakatlar o‘rtasidagi tovar ayirboshlashni ko‘paytirish, savdo hajmi muvozanatini tenglashtirish, zarur mahsulotlarni o‘zaro yetkazib berishni ko‘paytirish muhimligini ta’kidladi. Bu borada Budapeshtda tashkil etilayotgan O‘zbekiston—Vengriya savdo uyi imkoniyatlaridan samarali foydalanish zarurligi qayd etildi. Davlat rahbari ikki mamlakat hududlari o‘rtasida sheriklik aloqalarini o‘rnatish, har yili Mintaqalar forumini o‘tkazish taklifini bildirdi.

Vengriya qishloq xo‘jaligi, mevalarni saqlash va qayta ishlash, baliqchilik hamda urug‘chilik sohalaridagi ilg‘or tajriba va texnologiyalar bilan almashishga tayyorligini bildirdi.

Uchrashuvda madaniy-gumanitar sohalardagi hamkorlikni rivojlantirish masalalariga ham katta e’tibor qaratildi.

Ta’kidlash kerakki, tashrif doirasida ko‘p qirrali sheriklikni kengaytirishga qaratilgan 10 dan ortiq hujjat imzolandi. Rasmiy tadbirlar yakunida Ko‘ksaroy qarorgohining anjumanlar zalida ana shu hujjatlarni almashish marosimi hamda ommaviy axborot vositalari vakillari bilan uchrashuv tashkil etildi. 

“Daryo” muxbiri ushbu tadbirlarning ayrimlarida kadrlarga muhrlangan lahzalarni ulashdi.