Rossiyaning koronavirusga qarshi “Sputnik V” vaksinasi Ukrainada ro‘yxatdan o‘tkazilmaydi. Bu haqda Ukraina sog‘liqni saqlash vaziri Maksim Stepanov ma’lum qildi, deb yozadi “Interfaks”.

Uning aytishicha “qaysidir siyosiy kuch Rossiya vaksinasini ro‘yxatdan o‘tkazish masalasida qandaydir vasvasa keltirib chiqargan”, ammo Kiyev “Sputnik V”ni ro‘yxatdan o‘tkazmaydi.

Vazir, shuningdek, siyosatchilarning COVID-19’ga qarshi emlash kampaniyasining barbod bo‘lgani haqidagi gaplariga quloq solmaslikka chaqirdi. Uning so‘zlariga ko‘ra, Ukrainada emlash kampaniyasining birinchi bosqichida qariyb 367,5 ming kishi vaksina oladi.

“Birinchi bosqichda biz koronavirusga chalinish va kasallikning rivojlanib ketishi xavfi yuqori bo‘lgan odamlarni, shuningdek, COVID-19’ga qarshi kurashda muhim funksiyalarni bajarayotganlarni emlaymiz. Birinchi bosqich 367 491 kishining vaksina olishini ko‘zda tutadi”, — dedi u.

Stepanovning ta’kidlashicha, Ukrainada emlash uchun “klinik sinovlarning barcha bosqichlaridan o‘tgan va uchinchi bosqich bo‘yicha oraliq ma’lumotlar taqdim etilgan vaksinalar hamda dunyoda ro‘yxatga olingan vaksinalar” qo‘llaniladi.

“Muxolifat platformasi — Hayot uchun” partiyasi siyosiy kengashi raisi Viktor Medvedchuk avvalroq “Biolek” farmatsevtika kompaniyasi 30-dekabr kuni Ukraina Sog‘liqni saqlash vazirligiga va SSV Davlat ekspert markaziga murojaat qilib, “Sputnik V” vaksinasini davlat ro‘yxatidan o‘tkazishni so‘raganini ma’lum qilgandi.

5-yanvar kuni “Biolek” Ukraina SSVga “Sputnik V”ni ro‘yxatdan o‘tkazish haqidagi arizani 2020-yil 31-dekabrda berganini tasdiqladi.

2020-yil dekabri boshida Rossiya to‘g‘ridan to‘g‘ri investitsiyalar fondi “Biolek” AJ Ukrainada Rossiyaning “Sputnik V” vaksinasini ishlab chiqarishga tayyorligini ma’lum qilgandi. Ammo “Biolek” kompaniyasi o‘shanda buni rad etgandi.

Avvalroq Rossiya vaksinasi Jazoir, Argentina, Belarus, Boliviya, BAA, Vengriya, Serbiya, Falastin, Venesuela, Paragvay, Pokiston, Turkmaniston va Eronda tasdiqlangan edi. Vaksina ishlab chiqarishni moliyalashtiradigan Rossiya to‘g‘ridan to‘g‘ri investitsiya jamg‘armasining ma’lumotlariga ko‘ra, 30 dan ortiq davlat Rossiya vaksinalariga qiziqish bildirgan.

Ukraina prezidenti Vladimir Zelenskiy mamlakatda ommaviy vaksinatsiya fevral oyida boshlanishini aytib o‘tgan edi.