TOShKENT, 16 sen - Sputnik. O'zbekiston prezidenti Shavkat Mirziyoyev 15 sentyabr kuni Rossiya Federatsiyasi Hukumati raisi o'rinbosari Aleksey Overchukni qabul qildi.

Uchrashuvda O'zbekiston-Rossiya strategik sheriklik munosabatlari kun tartibini yangi mazmun bilan boyitish maqsadida hamkorlikdagi ustuvor dastur va loyihalarni jadallashtirish muhimligi taʻkidlandi.

Xususan, iqtisodiy kooperatsiya bo'yicha uzoq muddatli dastur tayyorlash, qo'shma investitsiya loyihalarini ilgari surish hamda hududlar o'rtasida amaliy aloqalarni faollashtirishga alohida eʻtibor qaratildi.

Shuningdek, O'zbekistonning Evroosiyo iqtisodiy ittifoqi bilan hamkorligi va MDH doirasida yaqin muloqotlarni davom ettirish yuzasidan fikr almashildi.

Uchrashuvda Shavkat Mirziyoyev koronavirus infektsiyasi bilan bog'liq xavf-xatarlarga qaramay Rossiya va O'zbekiston o'rtasida faol muloqot va hamkorlik surʻati saqlab qolinayotganini katta mamnuniyat bilan qayd etdi.

O'z navbatida Aleksey Overchuk uchrashuv o'tkazish imkoniyati uchun prezident Shavkat Mirziyoyevga minnatdorlik bildirdi hamda Rossiya prezidenti Vladimir Putin va hukumati raisi Mixail Mishustinning salomi va eng ezgu tilaklarini yetkazdi.