Isroil Eronga bir necha bor havo zarbalari berdi. Hujum boshlangani haqida dastlab 'Axios' portali xabar berdi. Buni Isroil mudofaa vaziri Isroel Kas ham tasdiqladi.

'Isroilning Eronga preventiv zarbasidan soʻng, yaqin kelajakda Isroil va uning tinch aholisiga raketa va dron hujumi kutilmoqda', ' dedi Kas.

Avvalroq, 'ABC News' Isroil hukumati yaqin kunlarda Eronga zarba berishi mumkinligi haqida xabar bergandi. Telekanalning uch manbasi Vashingtonning hujumga tayyorgarlik koʻrishga aloqasi bor yoki yoʻqligini bilmasligini aytgan.

Shuningdek, Eron hukumati Isroil tomonidan hujum sodir boʻlgan taqdirda unga javob rejasi ishlab chiqqanini maʼlum qilgandi. Taxminlarga koʻra, javob choralari yuzlab ballistik raketalardan foydalanishni oʻz ichiga oladi.

Isroil favqulodda holat eʼlon qildi Isroilda favqulodda holat eʼlon qilindi, butun mamlakat boʻylab sirenalar yangradi.

Isroil mudofaa kuchlari ichki front qoʻmondonligi ham xuddi shunday ogohlantirish bilan mamlakatning istalgan nuqtasiga yetib borishga qodir boʻlgan ogʻir raketalar bilan hujum qilinishi mumkinligini taʼkidladi. Mamlakatda barcha taʼlim muassasalari yopildi, tadbirlar va yigʻilishlar taqiqlandi, faqat zarur sohalar bundan mustasno.

Isroilning Ben Gurion aeroporti ehtimoliy javob hujumi munosabati bilan tungi reyslarni bekor qildi va Erondan javob kutilayotgani uchun kamida ertalabgacha reyslar amalga oshirilmaydi.

Eron fuqaro aviatsiyasi tashkiloti vaziyatga oydinlik kiritilgunga qadar Tehrondagi Imom Humayniy aeroportidagi faoliyatini toʻxtatdi.

Netanyahu hujum nishonini aytdi Isroil Bosh vaziri Benyamin Netanyahu Eronga zarba berish maqsadini aytdi. Uning aytishicha, yahudiy davlati Eronning yadroviy boyitish dasturining markaziga zarba bergan.

'Biz Eronning yadroviy boyitish dasturining markaziga zarba berdik, biz Eronning yadroviy qurol dasturining markaziga zarba berdik, Eronning Natanzdagi asosiy boyitish inshootiga hujum qildik', ' dedi Netanyahu.

Siyosatchining qayd etishicha, hujum Eron raketa obyektlariga qilingan. Uning taʼkidlashicha, asosiy maqsad Isroilga tahdidni bartaraf etishdir. Operatsiya 'qancha kerak boʻlsa, shuncha kun' davom etadi.

Isroil mudofaa kuchlari matbuot kotibi operatsiyaning birinchi bosqichi yakunlangani haqida xabar berdi. 'Times of Israel' gazetasi harbiy amaldorlarga tayanib, 'Rising Lion' operatsiyasi bir necha kun davom etishi mumkinligini xabar qildi.

'Qisqa vaqt ichida Isroil harbiy-havo kuchlarining oʻnlab samolyotlari operatsiyaning birinchi bosqichini yakunladi, bunda oʻnlab harbiy obyektlarga, jumladan, Eronning turli hududlaridagi yadroviy obyektlarga zarbalar berildi', ' deydi u.

'Reuters' Isroil harbiy amaldoriga tayanib xabar berishicha, Eron harbiy qoʻmondonlari ham Isroil zarbalari nishoniga aylanmoqda.

'Shot' Telegram kanalining taʼkidlashicha, zarba qurboni Eron armiyasi bosh shtabi boshligʻi Muhammad Bakariy boʻlishi mumkin edi, biroq bu maʼlumotning rasmiy tasdigʻi yoʻq.

Bundan tashqari, Eronning 'Tasnim' axborot agentligi Islom inqilobi qoʻriqchilari korpusi qoʻmondoni Husayn Salamiy havo hujumi natijasida halok boʻlganini tasdiqladi.

'Ynet' portalining xabar berishicha, Isroil minglab zahiradagi askarlarni chaqirishni boshlagan. Muhim harbiylar boʻlinmalar, Harbiy havo kuchlari, barcha qoʻmondonliklar razvedka uchun safarbar qilinmoqda.

Hujum Eronning bir qancha viloyatlariga yoʻnaltirildi Portlash tovushlari Eronning qator viloyatlarida, jumladan, Kirmonshoh va Loriston viloyatlarida ham eshitildi. Bu haqda 'Tasnim' agentligi Isroil havo hujumlari haqidagi xabarlar ortidan maʼlum qildi.

'Al Masirah' telekanali Isroil harbiylarini Tehrondagi turar-joy binolariga zarba berishda aybladi. Eron poytaxtida havo hujumidan mudofaa tizimlari va davomli portlashlar ovozlari eshitildi. Mahalliy OAV shahar uzra tutun koʻtarilayotgani tasvirlangan lavhalarni tarqatdi. Taʼkidlanishicha, hujum natijasida qurbonlar va jarohatlanganlar bor, ularning aniq soni hozircha nomaʼlum.

'Israel Today' Telegram kanali Eronning uran boyitish zavodlari joylashgan Natanz shahriga zarba berilgani tasvirlarini eʼlon qildi.

AQSH hujumga aloqasi yoʻqligini aytdi AQSH prezidenti Donald Tramp Isroilning Eronga hujumidan keyin vazirlar mahkamasi yigʻilishini chaqirishga qaror qildi, deb xabar bermoqda CNN telekanali Oq uy rasmiylariga tayanib.

AQSH Davlat kotibi Marko Rubioning aytishicha, AQSHning Eronga berilgan zarbalarga aloqasi yoʻq, Vashingtonning ustuvor vazifasi mintaqadagi AQSH kuchlarini himoya qilish boʻlib qolmoqda.

Uning taʼkidlashicha, Isroil Vashingtonni, uning fikricha, bu operatsiya oʻzini himoya qilish uchun zarur boʻlganligi haqida xabardor qilgan.

'Eronga zarba berish bilan bizning hech qanday aloqamiz yoʻq va bizning eng muhim vazifamiz mintaqadagi kuchlarimizni himoya qilishdir', ' deydi Marko Rubio.

Uning qoʻshimcha qilishicha, Tramp maʼmuriyati AQSH kuchlarini himoya qilish uchun barcha zarur choralarni koʻrishni buyurgan. Oq uy rahbari Eronni AQSH manfaatlariga daxl qilmaslikka va amerikalik xodimlarga zarar bermaslikka chaqirdi.

'Axios' avvalroq taʼkidlaganidek, AQSH Isroilning havo mudofaa tizimi yadroviy inshootlarga ehtimoliy hujumga javoban Eronning raketa zarbasiga dosh berolmasligidan xavotirda.

Nashrning yozishicha, Trampning Yaqin Sharq boʻyicha maxsus vakili Stiv Utkoff Eron yadroviy inshootlarga zarba berishga javob qaytarsa, Isroil tomonida ommaviy qurbonlar boʻlishi mumkinligi haqida ogohlantirgan. Portal, shuningdek, AQSH razvedkasi maʼlumotlariga asoslanib, Eronda 900 kilogramm va undan ortiq ogʻirlikdagi zaryadni koʻtara oladigan ikki mingga yaqin raketa borligini, Isroil ular yetib bora oladigan hududda ekanini yozdi.

Isroilni 'achchiq va alamli' taqdir kutmoqda ' Eron oliy rahnamosi Eron oliy rahnamosi Ali Xomanaiy Isroilning Eronga hujumiga izoh berib, yahudiy davlati qilgan ishi uchun albatta jazolanishini aytdi.

'Bugun tong saharda sionistik rejim sevimli yurtimizdagi jinoyati bilan oʻzining iflos va qonli qoʻlini oshkor qildi hamda oʻzining yovuz tabiatini har qachongidan ham koʻproq koʻrsatdi... Agar Xudoning irodasi boʻlsa, Islom Respublikasi qurolli kuchlarining qudratli qoʻli uni tark etmaydi', ' dedi Xomanaiy.

U oʻz murojaatida bir qancha qoʻmondon va olimlarning oʻlimini ham tasdiqladi. Respublika Oliy rahnamosi yahudiy davlati bu harakatlari bilan oʻzi uchun 'achchiq va alamli' taqdirni tayyorlab qoʻyganini taʼkidladi.