FAOning mazkur loyihasi qurgʻoqchil hududlarda ekotizimlarning barqarorligini taʼminlash, tuproq degradatsiyasining oldini olish, ekotizim xizmatlarini yaxshilash va qishloq xoʻjaligi mahsulotlarini xavfsizligini oshirish maqsadlarini koʻzda tutadi. Oʻzbekistonning qurgʻoqchilikka moyil hududlarida agroekologik muhitni yaxshilash, yer va oʻrmon resurslaridan oqilona foydalanish va barqaror qishloq xoʻjaligini rivojlantirish ushbu loyihaning ustuvor yoʻnalishlaridan biridir.

Buxoro viloyatida ushbu tashabbus doirasida taqdim etilgan gaz xromatografi asbobi tuproq va oʻsimlik mahsulotlarining sifatli tahlil qilinishini taʼminlash orqali agroekotizimlarning barqarorligini oshirishga xizmat qiladi. Zamonaviy texnologiyalar yordamida aniqlangan ishonchli maʼlumotlar fermerlar, olimlar va agroiqtisodiy mutaxassislarga yer resurslarini samarali boshqarishda ilmiy asoslangan tavsiyalar berish imkonini beradi.

Mazkur laboratoriya uskunasi yordamida tuproq tarkibidagi pestitsid va gerbitsidlar miqdori tahlil qilinadi, oʻsimlik mahsulotlarining ekologik xavfsizligi aniqlanadi, tuproq unumdorligiga kimyoviy moddalar taʼsiri oʻrganiladi, ekotizimlarga zarar yetkazmaydigan agrotexnologiyalarni ishlab chiqishda ilmiy asos yaratiladi.

Tadbir davomida FAO mutaxassislari, Tuproqshunoslik va agrokimyoviy tadqiqotlar instituti olimlari hamda qishloq xoʻjaligi sohasi vakillari zamonaviy laboratoriya texnologiyalarining tuproqni degradatsiyadan himoya qilish va qishloq xoʻjaligi mahsulotlarining sifatini oshirishdagi ahamiyati haqida maʼruza va taqdimotlar oʻtkazdilar.

Tadbirda 'Ongli sayyora ' Tuproqni saqlash' harakatining vakillari ham ishtirok etdilar. Rossiya va MDH mamlakatlari koordinatori Rajagopal Sujata va Almagul Mamadaliyeva uskunani topshirish marosimida qatnashib, barqaror qishloq xoʻjaligi uchun tuproqni saqlash va tahlil qilishning muhimligini taʼkidladilar. Ularning ishtiroki Oʻzbekistondagi xalqaro tuproqni saqlash tashabbusi va ilmiy muassasalar oʻrtasidagi hamkorlikning oʻsib borayotganini koʻrsatdi.