Arqonda sakrash salomatligimiz uchun qanchalar foydali ekanini bilasizmi? Oddiy shu mashq yordamida ozish mumkinligini-chi?

Ushbu jismoniy faollik har qan­day kardiomashg‘ulotlarga qaraganda ko‘proq kaloriya yo‘qotishga yordam beradi. Shuningdek, yog‘ni eritadi, mushaklarni kuchaytiradi, chidamlilikni oshiradi. To‘g‘ri texnika bilan mashq bajarilsa, sezilarli darajada vazn yo‘qotishning imkoni bor.

Xo‘sh, vazn yo‘qotish uchun arqon bilan qanday va qancha sakrash kerak? Avvalo, unutmangki, hech qan­day jismoniy mashqlar parhezga rioya qilmasdan turib qorindagi yog‘lardan xalos bo‘lishga yordam bermaydi. Demak, ozish uchun har kuni mashq qilishingiz lozim. Birinchi marta mashg‘ulot 1–2 daqiqadan oshmasligi kerak. Har 3–4 kunda ikki daqiqadan qo‘shing. Tezlik­ni kuzatish muhim, dastlab u minimal bo‘lsin. Shu tarzda mashq qilish orqali siz nafaqat vazn yo‘qotasiz, balki tananing barcha mushaklarining uyg‘unli­gini oshirasiz, oyoqlar, boldirlarni mustahkam­laysiz, holatni muvofiqlashtirishni, muvozanat hissini, chaqqonlikni yaxshilaysiz. E’tibor beringki, ovqatlanishdan oldin yoki ovqatdan ikki soatdan keyin mashq bilan shug‘ullanish maqsadga muvofiq.

Agar siz ko‘pincha o‘tirib ishlaydigan bo‘lsangiz yoki aksincha, doimiy og‘ir narsani ko‘tarish tufayli belingiz tez-tez og‘riydigan bo‘lsa, bu holatda ham arqonda sakrash mashqi qo‘l keladi. Chunki bu jarayonda umurtqa pog‘onasi cho‘ziladi. Natijada skolioz muammosi xavfi kamayadi.

Shu bilan birga, arqonda sakrash mashqi yurak faoliyatini yaxshilaydi, organizmda yig‘ilib qolgan tuzlarni haydashga yordam beradi. Yana bir muhim jihati – stressga qarshi kurashishda eng samarali vositalardan biri hisoblanadi, asab tizimiga ham ijobiy ta’sir ko‘rsatib, kayfiyatni yaxshilaydi.

Ushbu mashg‘ulot ozish uchun ham, salomatlik uchun ham foydali bo‘lsa-da, mumkin bo‘lmagan holatlar ham bor. Xususan, tomirlar varikozi, haddan tashqari semizlik, tromboflebit, tizza, oyoq, chanoq sohasi jarohatlari, yurak kasalliklari, gipertoniya va yallig‘lanish kasalligi bo‘lganlar uchun arqonda sakrash mashqi holatni og‘irlashtiradi.

Shuningdek, 50 yoshdan oshganlar mutaxassis tavsiyasisiz mazkur mashqni bajarishi tavsiya etilmaydi.

Adolat FAYZIYEVA tayyorladi.