25-fevral kuni Adliya vazirligi tomonidan ishlab chiqilgan Oʻzbekistonda homiylik faoliyatini amalga oshirish tartibini takomillashtirish'toʻgʻrisidagi qonun loyihasi'Oliy Majlis Qonunchilik palatasida deputatlar tomonidan birinchi oʻqishda qabul qilindi.

Qonun loyihasiga koʻra, endilikda jismoniy shaxslar faqat oʻzi yoki yaqin qarindoshi uchun xayriya yigʻishi mumkin boʻladi. Koʻngillilar esa oʻziga begona boʻlgan shaxslar manfaati uchun xayriya yigʻishda faqat eʼlon berish orqali koʻmaklashadi.

Xayriya qutisi faqat nodavlat tashkilotlar va boshqa homiylik qiluvchi yoki oluvchi yuridik shaxslar tomonidan oʻrnatilishi belgilangan.

Shuningdek, nodavlat tashkilotlar va boshqa homiylik qiluvchi yoki oluvchi yuridik shaxslar naqd pul shaklida xayriyani faqat xayriya qutisi orqali yigʻadi. Xayriya qutisi joylashtiriladigan manzil oldindan eʼlon qilinadi, uni ochishda guvohlar qatnashadi hamda bu jarayon videotasvirga olinib, jamoatchilikka eʼlon qilinadi.

Xayriyalarni yigʻish hamda xayriya qutilarini oʻrnatish tartibini buzganlik uchun maʼmuriy javobgarlik belgilanadi.

'Qonun loyihasining qabul qilinishi homiylik xayriyalarini yigʻish tartibini buzishning oldini olish, homiylik tashkilotlari faoliyatining shaffofligini taʼminlash hamda ularga nisbatan fuqarolarning ishonchini ortishiga xizmat qiladi', deyiladi Oliy Majlis Qonunchilik palatasi xabarida.