Istam IBROHIMOV/'Xalq soʻzi'. Buxoro shahrida Vazirlar Mahkamasi huzuridagi Migratsiya agentligining viloyat filiali tashabbusi bilan Xalqaro mehnat yarmarkasi oʻtkazildi. Unda xususiy bandlik agentliklari, nodavlat taʼlim muassasalari, bir qator hamkor tashkilotlar vakillari ishtirok etdi.

' Tadbirdan koʻzlangan asosiy maqsad viloyatimizda xususiy bandlik agentliklarining filiallarini ochish, mavjud boʻsh ish oʻrinlarini keng targʻib qilish, kam daromadli va ishsiz fuqarolarning bandligini taʼminlash, qolaversa, xalqaro mehnat bozori talablarini oʻrgangan holda ularni xorijiy til hamda turli kasblarga oʻqitib, xavfsiz va tartibli migratsiyaga yoʻnaltirishdan iborat, ' deydi Migratsiya agentligi Buxoro viloyat filiali rahbari Nozima Xoliqova. ' Yarmarkada xorijga ishlagani ketish istagini bildirgan 400 nafarga yaqin fuqaro qatnashdi. Ular oʻzlari xohlagan ish boʻyicha zarur maʼlumotlarga ega boʻldi. Shuningdek, u yoki bu davlatda mehnat qilish niyatini bildirganlar xususiy bandlik agentliklari orqali roʻyxatga olindi.

Aytish joizki, chet elga ishlagani bormoqchi boʻlganlarni tartibli tarzda joʻnatish dolzarb masala sanaladi. Afsuski, ayrim yurtdoshlarimiz xorijiy davlatlarning mehnat qonunchiligi haqida kerakli maʼlumotlarga yoki kasb-hunarga ega boʻlmay, til oʻrganmay turib xorijga yoʻl olishadi. Tavakkalchilik ortida esa istaymizmi-yoʻqmi xavf-u xatar yotadi. Xorijda sarson-sargardon boʻlib, oilasidagilarni ham xavotir-u tashvishga qoʻygan fuqarolar yoʻq deysizmi? Yarmarka shu nuqtayi nazardan ham foydali boʻldi. Qolaversa, tadbirda xususiy bandlik agentliklari hamda nodavlat taʼlim muassasalari bilan kelishuv memorandumi imzolandi.

Darvoqe, Migratsiya agentligining viloyat filiali tomonidan amalga oshirilayotgan tizimli ishlar oʻz samarasini bera boshladi. Chunonchi, tartibli migratsiyaga yuborish borasida Buxoro viloyati yanvar oyi natijalariga koʻra, ilk bor peshqadamga aylandi.