AQSHning mashhur CNN nashrida chop etilgan maqolada Oʻzbekiston arxitekturasiga boʻlgan eʼtibor ortib borayotgani va mamlakat yangi arxitektura manzili sifatida shakllanayotgani haqida soʻz borgan. Mazkur maqola Oʻzbekistonning jahon madaniy va arxitektura makonida oʻz oʻrnini mustahkamlab borayotganiga ishora qilib, kelajakdagi imkoniyatlarni ochib beradi.

Maqolada qayd etilishicha, Toshkent shahridagi brutalizm, oriyentalizm, modernizm va futurizm kabi turli uslublar meʼmoriy boylikning turli tomonlarini namoyon etadi. Mehmonxonalar, teatrlar, savdo markazlari, metro stansiyalari va boshqa jamoat inshootlari shaharni 'progressiv sotsialistik hayotning laboratoriyasi'ga aylantirgan. Bundan tashqari, Samarqand, Buxoro va Xiva kabi shaharlardagi qadimiy 'madrasa' va 'karvonsaroylar' Ipak yoʻli savdogarlari uchun qurilgan tarixiy obidalar ekanligi taʼkidlangan.

'Toshkentda mashina haydash xuddi arxitektura uchun moʻljallangan tasvirlar kitobi varaqlanishiga oʻxshaydi. Bu yerda sovet brutalizmi, oriyentalizm, modernizm, futurizm va neoklassik uslublarining namunalari jamlangan. 1966-yildagi zilzila uning infratuzilmasining katta qismini vayron qilgandan soʻng, Toshkent shaharsozlik laboratoriyasiga aylandi', deya boshlanadi maqola.

Shuningdek, maqolada hozirgi hukumatning madaniy merosni asrab-avaylash va dunyoga tanitish borasidagi saʼy-harakatlari alohida eʼtirof etilgan. Oʻzbekiston Sanʼat va Madaniyatni Rivojlantirish jamgʻarmasi raisi Gayane Umerova oʻz bayonotida 'Madaniy boyliklarni saqlab va tiklab, Oʻzbekistonni global madaniy manzil sifatida tanitishga erishamiz', deb taʼkidlagan CNN nashriga. Uning fikricha, ushbu investitsiya turizm daromadlarini oshirish, yangi ish oʻrinlari yaratish va shaharlarni tiklash uchun katta imkoniyat beradi.

CNNning maʼlum qilishicha, mamlakatda barqaror arxitektura tamoyillari oʻrganilmoqda. Qadimiy inshootlar oʻzining energiya samaradorligi bilan ajralib turadi. Binolardagi havo aylanishi va tabiiy materiallardan foydalanish yozda salqin, qishda esa iliq muhitni taʼminlaydi.

Yangi 'Toshkent shahri' loyihasi bugungi kunda Oʻzbekistonning zamonaviy meʼmoriy gʻoyalari markaziga aylanayotgani ham nashrning nigohidan chetda qolmagan. Zaxa Hadid byurosi tomonidan ishlab chiqilgan 'Alisher Navoiy xalqaro ilmiy tadqiqot markazi'ning innovatsion dizayni mahalliy materiallardan foydalanish orqali ekologiyaga mos yechimlarni namoyon etadi. Bu kabi loyihalar nafaqat mamlakatning meʼmoriy rivojlanishiga, balki yosh meʼmorlarning iqtidorini oshirishga xizmat qiladi.

CNN maqolasi Oʻzbekistonning boy madaniy va arxitektura merosini saqlash va uni zamonaviy yechimlar bilan boyitish orqali global diqqat markaziga aylanayotganini taʼkidlaydi. 'Mamlakatning oʻtmishi va bugungi rivojlanishi uygʻunlashib, uni yanada barqaror va jozibador meʼmoriy manzilga aylantirmoqda', deyiladi nashrda.

Maqolada qayd etilganidek, Oʻzbekiston oʻzining boy meʼmoriy merosini saqlash va rivojlantirish orqali dunyo madaniy markazlaridan biriga aylanish sari dadil qadam qoʻymoqda. Bu saʼy-harakatlar mamlakatni xalqaro arxitektura manziliga aylantirishda muhim ahamiyat kasb etadi.

Oʻzbekiston haqidagi CNN maqolasida mamlakatning oʻziga xos meʼmoriy merosi va zamonaviy rivojlanish jarayonlari haqida quyidagi asosiy faktlar va fikrlar keltirilgan:

Toshkent ' arxitektura laboratoriyasi ekani haqida

'Toshkentda mashina haydash xuddi arxitektura uchun moʻljallangan tasvirlar kitobi varaqlanishiga oʻxshaydi. Bu yerda sovet brutalizmi, oriyentalizm, modernizm, futurizm va neoklassik uslublarining namunalari jamlangan', ' CNN

1966-yil zilzilasi va shahar tiklanishi haqida

'1966-yilgi zilzila shahar infratuzilmasining koʻp qismini yoʻq qildi. Shu sababdan ham, Toshkent urbanizm laboratoriyasiga aylandi. Meʼmorlar shaharni qayta tiklash uchun yirik yoʻllar, turar-joy binolari, mehmonxonalar, teatrlar, savdo markazlari va metro stansiyalari qurilishiga jalb qilindi', ' CNN

Zamonaviy inshootlar va loyihalar haqida

'Bugungi kunda Zaxa Hadid va Tadao Ando kabi mashhur meʼmorlar byurolari tomonidan loyihalar amalga oshirilmoqda. Shuningdek, 2025-yilgi Yoshlar Osiyo Olimpiya oʻyinlari uchun 'Olimpiya shaharchasi' loyihasi ishlab chiqilmoqda', ' CNN

Oʻzbekiston hukumatining madaniy merosni saqlashga eʼtibori haqida

'Oʻzbekiston prezidenti Shavkat Mirziyoyev hukumati tarixiy arxitektura merosini dunyoga tanitish uchun katta resurslar yoʻnaltirmoqda. Oʻzbekiston Sanʼat va Madaniyatni Rivojlantirish jamgʻarmasi raisi Gayane Umerova taʼkidlaganidek: 'Bu investitsiya turizm daromadlari, ish oʻrinlari yaratish va madaniy brendlash orqali oʻzini oqlaydi'', ' CNN

Sovet davri arxitekturasini qayta baholash haqida

'Sovet modernizmiga boʻlgan qiziqish soʻnggi yillarda ortib bormoqda. Mazkur arxitekturaning ahamiyatini anglatish uchun Toshkent modernizmi haqidagi ilmiy kitob va maxsus mobil ilovalar yaratilgan', ' CNN

Barqaror meʼmoriy yechimlari haqida

'Oʻzbekistonning qadimiy binolari tabiiy energiya samaradorligiga ega. Masalan, ular yozda salqin va qishda issiq muhitni taʼminlaydi. Bu esa zamonaviy barqaror arxitektura uchun katta dars boʻlishi mumkin', ' CNN

Yangi Toshkent shahri va ekologik yondashuvlari haqida

'Yangi Toshkent shahri loyihasi zamonaviy dizayn va barqaror arxitektura gʻoyalari markaziga aylanmoqda. Zaxa Hadid byurosi tomonidan taqdim etilgan loyihalar mahalliy materiallardan foydalangan holda ekologik yechimlarni namoyon etyapti', ' CNN

CNN kabi xalqaro nufuzli nashrning Oʻzbekiston meʼmoriy merosi haqida maqola yozishini faqatgina OAVning kichik bir ishi sifatida qabul qilinadigan voqea sifatida emas, balki mamlakatning madaniy va turistik salohiyatini global maydonda tan olinishi sifatida baholash mumkin. Bunday eʼtibor Oʻzbekistonning boy tarixiy merosi va zamonaviy meʼmoriy rivojlanishini xalqaro darajada namoyon qilishga xizmat qiladi. Jahonning yetakchi axborot maydonlarida Oʻzbekiston haqidagi materiallar dunyo sayyohlari va investorlarining eʼtiborini jalb qiladi, bu esa mamlakat iqtisodiy rivojlanishiga katta taʼsir oʻtkazadi.

Birinchi navbatda, CNN maqolasi Oʻzbekistonning meʼmoriy boyligini global miqyosda oʻrganish imkoniyatini beradi. Sovet modernizmi, tarixiy Ipak yoʻli inshootlari va zamonaviy arxitektura loyihalarini qamrab olgan maqola Oʻzbekistonning koʻpqirrali madaniy merosini ochib berdi. Bunday koʻrsatuvlar mamlakatning arxitektura makoniga boʻlgan xalqaro qiziqishni yanada kuchaytirishi 'kunday' ravshan.

Ikkinchidan, bunday maqolalar jahon ommaviy axborot vositalarida Oʻzbekistonni 'global madaniy manzil' sifatida oʻziga xos targʻib qiladi. Madaniy meros va uni asrashga qaratilgan hukumat siyosatining koʻrsatilishi mamlakatning xalqaro obroʻsini mustahkamlaydi. CNN maqolasi oʻz oʻquvchilariga nafaqat tarixiy yodgorliklar, balki ekologik va barqaror meʼmoriy gʻoyalarini namoyon qilayotgan yangi qurilish loyihalarini ham tanishtirdi.

Uchinchidan, bunday maqolalar Oʻzbekistonning yosh avlod meʼmorlari uchun katta ilhom manbai boʻladi. Oʻzingizning arxitektura merosingiz dunyo miqyosida qadrlanayotganini bilish, mahalliy isteʼdodlarni rivojlantirish va ularni yangi gʻoyalarga chorlash uchun kuchli turtki boʻlishi mumkin. Bundan tashqari, xalqaro miqyosida tan olingan loyihalar yosh meʼmorlarning global raqobatda ishtirok etishi uchun yangi imkoniyatlar yaratadi.

Shuning uchun CNN kabi yirik platformalarning Oʻzbekiston haqida yozishini nafaqat milliy gʻurur, balki global imkoniyat sifatida qabul qilish lozim. Bunday maqolalar mamlakatni jahon sayyohlik xaritasida yanada yuqori pogʻonaga olib chiqib, turizm, investitsiya va madaniy muloqot sohalarida yangi imkoniyatlar eshiklarini ochadi. Bu esa Oʻzbekistonning barqaror rivojlanishga qaratilgan strategik maqsadlariga xizmat qiladi.

Sanjar Shomurodov CNN maqolasi asosida tayyorladi,

'Xalq soʻzi'.