Livan jabhasida kuchlarni toʻplash uchun Isroil Falastinning HAMAS harakati bilan oʻt ochishni toʻxtatishga rozi boʻlishi mumkin. Bu fikrlarni Turkiyaning Xavfsizlik va mudofaa strategiyalarini tadqiq qilish va amalga oshirish markazi direktori, Istanbul universiteti professori, isteʼfodagi general Fahri Erenel aytib oʻtdi.

Oldinroq, 'New York Times' oʻz manbalariga tayanib muzokarachilar Isroil bosh vaziri Binyamin Netanyahu sulhga erishish uchun Falastinning HAMAS harakati bilan Gʻazo sektoridagi mojaroni hal qilish boʻyicha oʻz pozitsiyasini yumshatishini taʼkidlayotgani haqida xabar bergan edi.

'Koʻrinishidan, Isroil Gʻazo sektoridagi operatsiyasini yakunlamoqda, Netanyahu AQSHga soʻnggi safari chogʻida AQSHning amaldagi prezidenti va nomzodlaridan qoʻllab-quvvatlov oldi. Shu nuqtayi nazardan, u butun harbiy kuchni mamlakat shimoliga oʻtkazish uchun HAMAS bilan oʻt ochishni toʻxtatish uchun jiddiy qadamlar qoʻyishi mumkin', deydi Erenel.

Uning fikricha, Livanga qarshi operatsiya boshlansa, Fransiya, Eron va Rossiya vaziyatga aralashishi mumkin. Xususan, Moskva buni Vashington manfaatlari yoʻlida AQSH tomonidan Oʻrtayer dengizi sharqida uyushtirilgan operatsiya sifatida koʻradi.

Shu oʻrinda mutaxassis Isroil Livanga bostirib kirish uchun bahona topish maqsadida Golan tepaliklaridagi sport maydonchasiga zarba berish bilan provokatsiya uyushtirishi yoki razvedka xatosi yuz berishi mumkinligini istisno etmadi.

'Hizbulloh' bunday zarbaga javoban qanday reaksiya boʻlishi mumkinligini yaxshi biladi', ' deydi ekspert.

Erenel, Golan tepaliklarida Isroil armiyasining eng muhim razvedka va maʼlumotlarni tahlil qilish markazlaridan biri joylashganligini taʼkidladi.

Shu yilning 10-iyul kuni Livanning 'Hizbulloh' harakati bosh kotibi Hasan Nasrulloh Gʻazo sektorida oʻt ochishni toʻxtatish boʻyicha kelishuvga erishilsa, Livan janubida muzokaralarsiz oʻt ochish toʻxtatilishini aytgandi.

Shanba kuni Isroil tez yordam xizmati Golan tepaliklariga berilgan zarbada 12 kishi halok boʻlganini maʼlum qildi. Isroil hujumda 'Hizbulloh' harakatini aybladi. Bosh vazir Benyamin Netanyahu Isroil ushbu hujumni javobsiz qoldirmasligini aytdi. Uning soʻzlariga koʻra, 'Hizbulloh' bu uchun 'juda katta tovon' toʻlaydi.

Oʻz navbatida, 'Hizbulloh' Isroil tomonidan bosib olingan Golan tepaliklarida joylashgan Majdal Shams qishlogʻini oʻqqa tutishga aloqadorligini rad etdi. Shunga qaramay, Isroil rasmiylari Livan bilan urush yaqinlashib qolganini eʼlon qila boshladilar. Yakshanba kuni ertalab Isroil armiyasi Livan va mamlakat janubidagi 'Hizbulloh'ning bir qator marralariga zarbalar berganini aytdi.

1967-yilgacha Golan tepaliklari Suriyaning Kuneytra provinsiyasi tarkibiga kirgan. Unda asosan arablarning alohida etnik-diniy guruhi boʻlgan druzlar istiqomat qilgan. 1967-yilgi olti kunlik urush, shuningdek, 1973-yilgi Toʻrtinchi arab-Isroil urushi paytida ushbu strategik hududning uchdan ikki qismi Isroil tomonidan bosib olingan. 1981-yilda yahudiy davlati bir tomonlama ravishda mintaqa ustidan suverenitetini eʼlon qildi. Ammo BMT Xavfsizlik Kengashi bu qarorni tan olmadi.

Isroil ' Livan chegarasidagi vaziyat 2023-yil oktyabr oyida Gʻazo sektorida Isroil harbiy amaliyotlari boshlanganidan keyin yomonlashdi. Isroil armiyasi va 'Hizbulloh' jangarilari chegaradagi hududlarda har kuni bir-birlarining pozitsiyalariga oʻq uzmoqda. Livan Tashqi ishlar vazirligi maʼlumotlariga koʻra, Isroilning oʻqqa tutishi tufayli Livan janubida 100 mingga yaqin odam uyini tark etishga majbur boʻlgan. Isroil tomoni xuddi shunday vaziyatga tushib qolgan 80 mingga yaqin shimoliy Isroil aholisi haqida xabar berdi.