Futbol bo‘yicha Ispaniya terma jamoasi hujumchisi Lamin Yamalning Fransiya darvozasiga kiritgan to‘pi Yevro-2024'ning eng chiroyli goli deb topildi. Bu haqda Yevropa futbol assotsiatsiyalari ittifoqi (UEFA) matbuot xizmati xabar berdi.

Yamalning goli evaziga Ispaniya terma jamoasiga fransuzlar bilan yarim final uchrashuvida hisobni tenglashtirdi va yakunda o‘yin tizginini “qizil furiya” tomoniga o‘tishini ta’minladi. Fransiya bilan bahsda Ispaniya 2:1 hisobida zafar quchib, musobaqa finaliga yo‘l olgandi. Futbolchi jarima maydonchasi tashqarisidan zarba berdi, to‘p ustunga tegib, keyin darvozaga kirdi. Yamal Fransiya jamoasiga qarshi o‘yinda Yevropa chempionatida eng yosh gol muallifiga ham aylandi. Forvard 16 yoshu 362 kunligida qit’a birinchiligida gol urishga muvaffaq bo‘ldi.

Yakunlangan Yevropa chempionatining eng yaxshi uchta golidan biri angliyalik yarim himoyachi Jud Bellingemning Slovakiya termasi bilan 1/8 final uchrashuvida kiritgan goli bo‘ldi. Bellingemning qaychi uslubida kiritgan goli inglizlarga o‘yinni qo‘shimcha bo‘limlarga qadar davom ettirish va yakunda g‘alabani o‘z tomoniga og‘dirish imkonini berdi. Turnirning eng yaxshi 3-goli deb shveysariyalik futbolchi Jerdan Shakirining guruh bosqichi 2-turida shotlandlarga (1:1) kiritgan aniq zarbasi topildi.

Reyting UEFA texnik kuzatuvchilari tomonidan tuzilgan. Hammasi bo‘lib 10 ta gol reytingdan o‘rin olgan.

Ma’lumot uchun, 14 iyundan 14 iyulga qadar Germaniyada bo‘lib o‘tgan Yevropa chempionati finalida Angliya terma jamoasini mag‘lub etgan (2:1) Ispaniya g‘olib bo‘ldi.