Germaniya hukumati o‘z harbiylarini 2029 yilgacha Rossiya bilan to‘g‘ridan to‘g‘ri urushga tayyorlamoqchi. Bu haqda kecha, 12 iyul kuni “Bild” nashri xabar berdi.

Germaniya Mudofaa vaziri Karsten Breyerning bayonotiga tayangan holda gazeta bergan hisobotda aytilishicha, rasmiy Berlin 2029 yilga borib Rossiyaning NATOga to‘g‘ridan to‘g‘ri hujumi uchun qulay sharoitlar yaratilishidan xavotirda.

“Siz taqvimingizda 2029 yilni belgilab qo‘ying. O‘sha vaqtgacha hali ko‘p ish qilish kerak va biz tayyor bo‘lishimiz kerak”, degan Breyer harbiy akademiyada kursantlar bilan uchrashuvda.

Mudofaa vaziri, shuningdek, 5-8 yil ichida Rossiyada 1,5 millionga yaqin askar bo‘lishi mumkinligini taxmin qilgan. Bu esa ayni paytda Ukrainada jang qilayotgan qo‘shinlar sonidan qariyb ikki barobar ko‘p.

Nashrning ta’kidlashicha, ayni paytda Bundesverda 181,5 ming askar bor. Mamlakatda harbiylar soni ancha kam. Shu boisdan ham Germaniya hukumati majburiy harbiy xizmatni tiklash masalasini ko‘rib chiqmoqda.

Bundan tashqari, jurnalistlar ikki davlatning harbiy-texnika zaxiralarini tahlil qildi. Hisobotga ko‘ra, Germaniya 300 dan kam asosiy jangovar tanklarga ega, Rossiya esa hozirda yiliga 1500 ga yaqin tanklarni ishlab chiqarmoqda yoki ta’mirlamoqda. Hisobotda, shuningdek, Germaniya armiyasining cheklangan o‘q-dorilar zaxirasi borligi va ular atigi ikki kunga yetarli ekanligi keltirilgan.

“Hukumat allaqachon Germaniyaning operatsion rejasini ishlab chiqdi. Bu hujjat Germaniya harbiy sohasini yuzaga kelishi mumkin bo‘lgan mojaroga tayyorgarlik ko‘rish uchun istiqbolli tuzilmasini belgilaydi”, deyilgan xabarda.

Eslatib o‘tamiz, avvalroq Germaniya Ukrainaga o‘zi bergan qurollardan Rossiyaga zarba berishda foydalanishga ruxsat bergandi.