Fransiya boʻlajak Olimpiada oʻyinlari uchun Sena daryosiga qoʻyilgan barjada uchar taksi porti ham joylashishini tasdiqladi. 'Aeroports de Paris SA' tomonidan quriladigan vertiport Parij markazidagi 'Austerlitz' temir yoʻl vokzali yaqinida joylashtiriladi. Bu haqda 'Bloomberg' nashri xabar bermoqda.

Maʼlum qilinishicha, Parij meriyasi loyihaga qarshi boʻlib, uchar taksilarning koʻp energiya talab qilishini va xavfli ekanligini iddao qilmoqda. Shu bois hozircha Olimpiada oʻyinlari vaqtida ulardan foydalanish masalasiga aniqlik kiritilmagan.

Ikki oʻrindiqli 'VoloCity' taksilarini ishlab chiqqan Yevropa startapi 'Volocopter GmbH' hali tijorat parvozlarini tartibga soluvchi sertifikatni olmagan. Shunga qaramay, kompaniya Olimpiada vaqtida koʻrgazmali parvozlarni amalga oshirishni rejalashtirmoqda. Oʻz navbatida, prezident Emmanuel Makron bu yangilikni Fransiya texnologik innovatsiyalarining ramzi sifatida namoyish qilishni qoʻllab-quvvatlagan.

Parijning haqiqiy maʼnodagi uchar taksilari shu yilning 31-dekabrdan ertalab soat 8:00dan kechki 5:00gacha ishlaydi. Rasmiy qarorga koʻra, sinov muddati davomida soatiga atigi ikkita reys va jami 900 ta reysga ruxsat beriladi. Hukumat ushbu cheklovlarni belgilashda shahar rasmiylari va 'Yashillar' partiyasi bilan kelishuvga tayyorligini bildirgan.

Parij meriyasi hukumat ruxsatiga qarshi qonuniy choralar koʻrishni rejalashtirmoqda. Maʼmuriyatga koʻra, ushbu taksilar shovqinning oshishiga, havoni qoʻshimcha ifloslanishiga va yuqori energiya isteʼmoliga olib keladi. Ekofaol Den Lertning fikricha, loyiha faqat boylarga foyda keltiradi.

'Volocopter' vakilining taʼkidlashicha, ularning taksilari mavjud transport tizimlarini toʻldirish uchun moʻljallangan va kompaniya muammolarni hal qilishga tayyor. Kompaniya sertifikatlashtirish jarayonini davom ettirish uchun moliyalashtirishni taʼminlagan. Ammo investorlar yoki moliyalashtirish tafsilotlarini oshkor qilmagan.

Avvalroq, koʻzga koʻrinmas niqobli qalpoqlar kashf qilingani haqida xabar berilgandi.