Bugun, 11 iyul kuni Toshkent shahrida yuz bergan yo‘l-transport hodisasi oqibatida bir hudud aholisi gazsiz qoldi. Bu haqda “Hududgaz Poytaxt” gaz ta’minoti filiali xabar berdi.

Qayd etilishicha, YTH soat 02:15 da sodir bo‘lgan va Yashnobod tumanidagi Go‘zal mahallasi hududidagi o‘rta bosimli gaz quvuriga shikast yetgan.

To‘nashuv zararlari bartaraf etilgunga qadar quyidagi hududlarda gaz ta’minoti vaqtincha to‘xtatildi:

• Go‘zal mahallasida 70 ta mahalliy aholi xonadonlari;
• Olmos mahallasida 58 ta ko‘p qavatli uyda 2436 ta xonadon;
• Qalqon mahallasida 40 ta ko‘p qavatli uyda 3200 ta xonadon;
• ulgurji xaridorlar: 10.

“Ta’mirlash ishlari yakunlangach, tabiiy gaz ta’minoti tiklanadi”, deyiladi xabarda.

Eslatib o‘tamiz, avvalroq Surxondaryo viloyati hududidan o‘tgan “Muzrabot-Dushanbe” magistral gaz quvurida avariya yuz bergani sababli viloyatning ko‘plab tumanlari gaz ta’minotidan uzilgandi.