Rossiyaning “Gazprom” kompaniyasi O‘zbekistonda o‘z vakolatxonasini ochdi. Bu haqda Rossiya Federatsiyasi yuridik shaxslarning yagona davlat reyestrida (USRLE) ma’lum qilindi.
Rossiya Savdo missiyasi 2024 yilning may oyida O‘zbekiston Energetika vazirligi va “Gazpromneft” kompaniyasi o‘rtasida hamkorlikni kengaytirish bo‘yicha yo‘l xaritasi qabul qilinganini eslatdi.
Ma’lumot uchun, Rossiyadan O‘zbekistonga gaz yetkazib berish bo‘yicha shartnoma 2023 yilning iyun oyida tuzilgan. Kelishuvga ko‘ra, O‘zbekistonga gaz yetkazib berish oktyabr oyida boshlangan bo‘lib, uning sutkalik hajmi 9 million kub metr, yillik hajmi qariyb 2,8 milliard kub metrni tashkil qiladi.
Eslatib o‘tamiz, avvalroq “Gazprom” 2040 yilgacha Qozog‘iston orqali O‘zbekiston va Qirg‘izistonga gaz tranziti bo‘yicha uzoq muddatli shartnomalar tuzgani, ushbu shartnomalar unga 12 milliard kub metrgacha gaz eksport qilish imkonini berishi haqida xabar berilgandi.