Buxoro viloyati ichki ishlar organlari xodimlari tomonidan o‘tkazilgan tezkor tadbirlar davomida pilla xomashyosining talon-toroj qilinishi bilan bog‘liq bir nechta holat fosh etildi. Jumladan, Jondor tumanida o‘tkazilgan tezkor tadbirda Buxoro shahrida yashovchi fuqaroning avtomashinasi to‘xtatib tekshirilganda, 200 kilogramm pilla xomashyosi borligi aniqlandi. Olib borilgan surishtiruv ishlari natijasida u pilla xomashyosini tumanning “Jamiyat” mahallasida yashovchi H. ismli ayoldan har bir kilosini 50 ming so‘mdan sotib olganligi ma'lum bo‘ldi. 

Kogon shahrida o‘tkazilgan tezkor tadbirda Qashqadaryo viloyatida yashovchi fuqaro boshqaruvidagi “Damas” rusumli avtomashinasi to‘xtatib tekshirilganda, yukxonasidan 295 kilogramm pilla xomashyosi chiqdi. Shuningdek, Shofirkon tumanida o‘tkazilgan tadbirlardan birida “Jo‘ynav” mahallasida istiqomat qiluvchi fuqaroga tegishli “Labo” rusumli avtomashinada 532 kilogramm pilla xomashyosi borligi aniqlandi. Qonun himoyachilarining tezkor surishtiruv ishlari natijasida fuqaro pilla xomashyosini Vobkent tumanida sotish maqsadida olib borayotganini tan oldi. Bundan tashqari, viloyat IIB xodimlari tomonidan Qorovulbozor tumanida o‘tkazilgan tezkor tadbir davomida G‘ijduvon tumanida yashovchi fuqaroga tegishli bo‘lgan “Ford” rusumli avtomashina to‘xtatib tekshirilganda, avtomashina yukxonasida 800 kilogramm, Kogon tumanida o‘tkazilgan tadbirda esa yana bir “Ford” rusumli avtomashinada 950 kilogramm pilla xomashyosi borligi aniqlandi. 

Mazkur tadbirlar jarayonida hujjatlashtirib olingan pilla xomashyosi tegishli joyga topshirilib, qonunbuzarlarga nisbatan tergovga qadar tekshiruv ishlari olib borilmoqda. Har bir holat bo‘yicha huquqiy baho berilib, javobgarlikning muqarrarligi ta'minlanadi.   

Mirzoqul AHADOV,

o‘z muxbirimiz.

Buxoro viloyati.