Fransiya Prezidenti Emmanuel Makron G‘azoda garovga olinganlarning ozod etilishini va doimiy o‘t ochishni to‘xtatishni kutayotganini ta’kidlagan holda AQSHning keng qamrovli kelishuv tuzish taklifini qo‘llab-quvvatlashini bildirdi. Bu haqda u o‘zining X ijtimoiy tarmog‘idagi sahifasida yozib qoldirdi.

Fransiya rahbari ikki davlatning tinch-totuv yashashi asosida Falastin-Isroil mojarosini hal qilishda garovga olinganlarning ozod etilishini, tinchlik va taraqqiyotga erishish uchun doimiy o‘t ochish to‘xtatilishi zarurligini aytdi.

Ma’lumot uchun, AQSH Prezidenti Jo Bayden 31 may kuni G‘azo sektori atrofidagi taranglikni bartaraf etish bo‘yicha uch bosqichli rejani taqdim etgandi. AQSH Prezidentining so‘zlariga ko‘ra, birinchi bosqich olti hafta davom etadi. U to‘liq o‘t ochishni to‘xtatishni, Isroil qo‘shinlarini G‘azoning barcha aholi punktlaridan olib chiqib ketishni, bir qator garovga olinganlarni, jumladan, ayollar, qariyalar, yaradorlarni ozod qilishni o‘z ichiga oladi. Olti haftalik sulh davomida Isroil va HAMAS kelishuvning ikkinchi bosqichiga o‘tish uchun bajarilishi kerak bo‘lgan shartlarni muhokama qilishi kutilmoqda.

Bitimning ikkinchi bosqichi “barcha tirik qolgan garovga olinganlarni, shu jumladan erkak askarlarni ham ozod qilish”, Isroil qo‘shinlarini G‘azo sektoridan olib chiqib ketish va “doimiy o‘t ochishni to‘xtatish”ni o‘z ichiga oladi. 

Kelishuvlarning uchinchi bosqichi G‘azo sektorini rekonstruksiya qilish, shuningdek, barcha halok bo‘lgan HAMAS garovga olinganlarning qoldiqlarini yaqinlariga topshirishni ko‘zda tutadi.

Eslatib o‘tamiz, Amerika Qo‘shma Shtatlari ma’muriyati joriy yilning 26 may kuni Rafahdagi chodir lagerida o‘nlab falastinliklarning o‘limiga sabab bo‘lgan Isroil mudofaa kuchlarining zarbasi AQSH Prezidenti Jo Baydenning qizil chizig‘ini buzgan yoki yo‘qligini tekshirayotganligi haqida xabar berilgandi.

Toir Obidov