AQSH, Yevropa Ittifoqi va NATOning Markaziy Osiyodagi siyosati mintaqa davlatlariga “rangli inqiloblar” xavfi bilan tahdid qilmoqda. Bu haqda Rossiya Tashqi ishlar vaziri o‘rinbosari Mixail Galuzin Ufada “Valday” xalqaro munozara klubining IV Markaziy Osiyo konferensiyasi ochilishida so‘z ochdi.

“Biz Vashington va Bryusselda eng muhim vazifani hal qilish – hududning resurs bazasiga kirish va unga tutash transport arteriyalarini, shuningdek, suvdan foydalanish tizimini nazorat qilish uchun noinsof o‘yin o‘tkazishayotganini ko‘ryapmiz. Shundan kelib chiqib, bu maqsadlarga erishilgach, Markaziy Osiyo davlatlari hukumatlari G‘arb uchun hamroh bo‘lishdan to‘xtaydi va shunga mos ravishda “rangli inqiloblar” xavfi ham to‘laqonli namoyon bo‘ladi", deydi Galuzin.

Diplomatning fikricha, “do‘stona bo‘lmagan mamlakatlar”ning strategik maqsadi Rossiya va Markaziy Osiyo respublikalari o‘rtasida nizo keltirib chiqarishdir.

“Markaziy Osiyo davlatlari poytaxtlari G‘arb bilan haddan tashqari yaqinlashish va Rossiyaga qarshi sanksiyalarga qo‘shilish salbiy oqibatlaridan xabardor”, deydi Galuzin.

U mintaqa mamlakatlari bir qator omillar, jumladan, geografiya bo‘yicha tabiiy ittifoqchi va hamkor ekanini urg‘uladi.

“Rossiya Markaziy Osiyo davlatlarining suvereniteti, mustaqilligi va hududiy yaxlitligini to‘liq hurmat qiladi”, deb ta’kidladi Galuzin.

Bundan tashqari, rossiyalik diplomat Markaziy Osiyo tashqi savdosining 33 foizi Rossiya hissasiga to‘g‘ri kelishini qo‘shimcha qildi.

“Hozirda Qozog‘iston, Qirg‘iziston va Tojikiston bilan bunday hisob-kitoblar hajmi 80 foizga, O‘zbekiston bilan 55 foizga, Turkmaniston bilan 24 foizga yetdi”, deydi u.

Eslatib o‘tamiz, o‘tgan oyda Buyuk Britaniya Tashqi ishlar vaziri Devid Kemeron Markaziy Osiyo davlatlari va Mo‘g‘ulistonga safar qilgandi. Kemeron mazkur safardan Markaziy Osiyo mamlakatlariga Buyuk Britaniya hamda mintaqada ta’sir o‘tkazish uchun kurashayotgan Rossiya va Xitoy bilan hamkorlik qilish o‘rtasida “tanlov” qilish imkonini berishni ko‘zlaganini ochiq aytdi. Kemeron ketganidan ko‘p o‘tmay, 26 aprel kuni Rossiya Tashqi ishlar vaziri o‘rinbosari Mixail Galuzin Toshkentda O‘zbekiston Tashqi ishlar vaziri Baxtiyor Saidov bilan uchrashdi. Uchrashuvdan so‘ng matbuotga bayonot bergan Galuzin Kemeronning O‘zbekistonga tashrifi Rossiyaga maksimal darajada zarar yetkazishga va uni ittifoqdoshlaridan uzoqlashtirishga qaratilganini ta’kidladi. Kecha, 13 may kuni Xitoy Xalq Respublikasi Davlat kengashi bosh vaziri o‘rinbosari Lyu Gochjun boshchiligidagi delegatsiya O‘zbekistonga kelib, Prezident Shavkat Mirziyoyev qabulida bo‘ldi, Toshkent shahrida Hamkorlik bo‘yicha O‘zbekiston-Xitoy hukumatlararo qo‘mitasining yettinchi yig‘ilishi bo‘lib o‘tdi.